مادەنيەت جانە سپورت ءمينيسترى ارىستانبەك مۇحامەدي ۇلى دوپينگ داۋىنا قاتىسى بار سپورتشىلاردىڭ ريودا وتەتىن وليمپياداعا قاتىسا المايتىنى تۋرالى مالىمدەدى، - دەپ حابارلايدى Qamshy.kz Tengrinews.kz -كە سىلتەمە جاساپ.

"ءبىزدىڭ سپورتشىلاردىڭ وسى دوپينگ داۋىنداعى تىزىمگە ىلىنۋىنە قاتىستى... ولاردىڭ ريو وليمپياداسىنا قاتىسۋى تۋرالى ايتۋ قيىن. ءقازىر ولار دايىن، جاستارى دا كەلىپ تۇر. مەنىڭشە، ولار توكيودا وتەتىن ويىندارعا قۋانا قاتىسادى. ءبىراق قازىرگى ۋاقىتتا ولار كەز كەلگەن سپورتتىق جارىستاردان شەتتەتىلدى"، - دەدى مينيستر پرەزيدەنتتىڭ وليمپيادا قۇراماسىنىڭ سپورتشىلارىمەن كەزدەسۋىنەن كەيىن يليا يلين، ءزۇلفيا چينشانلو، ماييا مانەزا مەن سۆەتلانا پودوبەدوۆانىڭ ريو وليمپياداسىنا قاتىسۋى تۋرالى سۇراققا جاۋاپ بەرە وتىرىپ.

ايتا كەتەيىك، "سپورتشىلار ريو وليمپيادالارىنا قاتىسا الماي ما؟" دەگەن سۇراققا مينيستر "ءيا، ارينە" دەپ جاۋاپ بەردى.

"دوپينگكە قارسى ءوتىپ جاتقان شارالار كوبىسىنە تۇسىنىكسىز بولىپ جاتىر. ولاردىڭ قانشالىقتى ءادىل، قانشالىقتى ادىلەتسىز ەكەنى... ءبىراق مۇنىڭ بارلىعى سەندەردى الاڭداتپاۋ كەرەك. سەندەردىڭ تاپسىرمالارىڭ - جەڭۋ، كۇرەسۋ"، - دەدى نازاربايەۆ اقوردادا سپورتشىلارمەن كەزدەسۋ بارىسىندا.

ەسكە سالايىق، وسىعان دەيىن ءيليننىڭ لوندوندا 2012 جىلى وتكەن وليمپيادادا الىنعان سىناماسىندا تىيىم سالىنعان زاتتاردىڭ بار بولىپ شىققانى بەلگىلى بولعان ەدى. سونىمەن قاتار، قازاقستاندىق تاعى ءۇش اۋىراتلەتتىڭ قانىنان دوپينگ تابىلعان بولاتىن. ياعني مايا مانەزا، ءزۇلفيا چينشانلو، سۆەتلانا پودوبەدوۆا دا جازعى ويىندارعا قاتىسپاۋى مۇمكىن. كەيىن ءيليننىڭ 2008 جىلعى بەيجىڭ وليمپياداسىنداعى دوپينگ-سىناماسى تىيىم سالىنعان زاتتىڭ بارىن كورسەتتى. يلين بولسا دوپينگ قولدانعانىن ۇزىلدى-كەسىلدى جوققا شىعارىپ وتىر.