استانا ورتالىعىنداعى "اتا-كەنت" تۇرعىن ءۇي كەشەنىنىڭ ۇلەسكەرى ولگا سۆەتكوۆا ءۇشىنشى قاباتتاعى ءوز پاتەرىنىڭ بالكونىندا ۇستىنە بەنزين قۇيىپ، ءوزىن-وزى ورتەمەك بولدى، - دەپ حابارلايدى Qamshy.kz.

ولگا سۆەتكوۆا ەكى جىل بۇرىن كوكتال شاعىن اۋدانىندا جاڭا سالىنىپ جاتقان ۇيدەن پاتەر الۋ ءۇشىن توعىز ميلليون تەڭگە قۇيعان. ءبىراق ءۇي ءالى سالىنباعان، اقشاسىن دا قايتارماعان.

امالى قالماعان ولگا ەرتەسىمەن بالكونعا شىعىپ الىپ، ۇستىنە بەنزين قۇيعان. وتتىقتى تۇتاتىپ تۇرعان ايەلدى قۇتقارۋشىلار ەكى ساعات بويى توقتاتۋعا تىرىسقان. ولگا وقيعا ورنىنا قۇرىلىس كومپانياسىنىڭ باسشىسى كەلمەسە، ءوزىن ورتەيتىنىن مالىمدەگەن.

ولگا ۋادە ەتىلگەن ءۇيى دە، قاراجاتى دا قايتپاي قالۋىنان كۇيەۋى ونى بالاسىمەن تاستاپ كەتكەنىن جانە بۇگىندە تۇكسىز قالعانىن ايتتى.

وقيعا ورنىنا «اتا كەنت» تۇرعىن ءۇي كووپەراتيۆىنىڭ باسشىسى قايرات بوداۋحان اكىمدىك وكىلدەرىمەن بىرگە كەلىپ، ايەلمەن كەزدەستى.

بوداۋحان سۆەتكوۆاعا جەتى كۇننىڭ ىشىندە قۇيعان قارجىسىن قايتارىپ بەرەتىنى تۋرالى قولحات جازىپ بەرگەن. وسىدان كەيىن ايەل قارسىلىق شاراسىن توقتاتتى.