الماتىدا تۋريستەردى شەتەلدەگى دەمالىسسىز قالدىرعان كەلىنشەك 3 جىلعا سوتتالدى، - دەپ حابارلايدى Qamshy.kz كتك ارناسىنا سىلتەمە جاساپ.

سان سوعىپ قالعان ازاماتتاردىڭ ىشىندە الماتى، شىمكەنت، اتىراۋ مەن اقتاۋ قالاسىنىڭ تۇرعىندارى جانە تۋراگەنتتەر دە بار. ءوزىن تۋرفيرما باسشىسىمەن دەپ تانىستىرعان عاليا شاراپوۆا جۇرتتان شامامەن 60 ملن تەڭگە جيناپ، ءىزىن سۋىتقان. بۇگىن سۋديا سوتتالۋشىنىڭ ەمشەكتەگى بالاسى بارىنا قاراماستان، وسى ىسكە نۇكتە قويدى.

تۇركياداعى ەڭ قىمبات قوناقۇيلەرگە جايعاستىرىپ، ۇمىتىلماس دەمالىس ۇيىمداستىرىپ بەرەمىن دەپ، جۇرتتى سان سوقتىرعان عاليا شاراپوۆا بۇگىن سوت زالىندا ءوزىن بايسالدى ۇستادى. ول ەكى جىل بويى ۋاقىتى كورسەتىلىپ، ءتۋريستتىڭ اتىنا تىركەلگەن بولمە مەن ۇشاق بيلەتتەرىن ساتقان. ءبىراق بارلىعى جالعان بولىپ شىقتى. الدانعان تۋريستەر پوليسياعا شاعىمدانعان سوڭ تەرگەۋ باستالىپ، پىسىقاي كەلىنشەك قاماۋعا الىنعان. ءبىراق اياعى اۋىر بولعان سوڭ، بوستاندىققا جىبەرىلىپتى. ال بۇگىن سوت ونىڭ سول ەمشەكتەگى بالاسى بولعانىنا قاراماستان جەڭىلدىك جاساعان جوق.

-3 جىلعا باس بوستاندىعىنان ايىرىلىپ، بارلىق مۇلكى تاركىلەنسىن. جازاسىن جالپى تارتىپتەگى كولونيادا وتەيدى. جانە 6 جىل تۋريزم سالاسىندا جۇمىس ىستەمەيتىن بولسىن.

جالپى بۇل كەلىنشەكتىڭ جىلمىسقى ارەكەتىنەن 80 ادام سان سوعىپ قالعان. ءبىراق پوليسياعا ارىزدى سونىڭ تەك 11ء-ى جازىپتى. دەمالىسى داۋعا ۇلاسىپ، سوتپەن اياقتالعان سول تۋريستەر بۇگىنگى ۇكىمىمەن كەلىسپەي وتىر. 

سۆەتلانا ايتمۇراتوۆا، جابىرلەنۋشى:

-بىزگە ۇلكەن ماتەريالدىق جانە مورالدىق شىعىن كوردىك. جابىرلەنۋشىلەردىڭ بارلىعى سوت ۇكىمىمەن كەلىسپەيدى. سەبەبى، ءبىزدىڭ شىعىندارىمىز وتەلگەن جوق. وسىنداي قىلمىس جاساعانى ءۇشىن كەمىندە 5 جىل تۇرمەدە وتىرۋى كەرەك ەدى.  

ال كەلتىرىلگەن ماتەريالدىق شىعىن كولەمى 60 ميلليون تەڭگەگە. قىرۋار قارجىنى ۇپتەپ كەتكەن عاليا شاراپوۆا تۋراگەنتتىكتەردىڭ بىرىنەن مالىمەتتەر ۇرلاسا، كەلەسىسىندە جولداما جاساعان. قىلمىسى اشكەرە بولعان ول سوت ۇكىمىن ەستىگەن سوڭ كىشكەنتاي بالاسىن سىلتاۋراتىپ، جاۋاپ بەرگىسى كەلمەدى. 

-بالامنىڭ   پامپەرسىن اۋىستىرۋعا بولا ما؟

-ارينە.

-مەنى ءتۇسىرۋدى دوعارىڭدارشى.

ەمىزۋلى بالاسىن وزىمەن بىرگە تەمىر تورعا الا كەتكەن عاليا شاراپوۆانىڭ مۇلكى تاركىلەنىپ، كەلتىرىلگەن ماتەريالدىق شىعىن وتەلمەك. 8 ايلىق بالاسىن ءوز ەركىمەن تۋىستارىنىڭ قاراۋىنا بەرمەگەن جاعدايدا ول بالالار ۇيىنە وتكىزىلەتىن بولادى.