بۇگىن استانادا ءوتىپ جاتقان جەر كوميسسياسىنىڭ كەزەكتى وتىرىسىندا ساياساتتانۋشى، كوميسسيا مۇشەسى دوس كوشىم جەر بولەتىن كوميسسيانىڭ ءۇشتىن ءبىر بولىگى عانا بيلىكتە، قالعانى قاراپايى حالىق بولۋى قاجەت ەكەنىدىگىن اتاپ ءوتتى، - دەپ حابارلايدى Qamshy.kz.
-ەرەجەدە كوميسسيا مۇشەلەرى بەس ادامنان كەم بولماۋى كەرەك دەگەن تالاپ بار. ونىڭ ىشىندە اۋىلدىق وكرۋگتەردىڭ اكىمدەرى، جەر رەسۋرستارىنىڭ جانە تاعى باسقا اتقارۋشى بيلىكتىڭ ازاماتتارى بار. ارينە، ءقازىر اتامەكەندى قوسىپ وتىر. ودان تاعى باسقا. ءبىراق ءبىزدىڭ ويىمىزشا، بارلىق اۋىلدىق وكرۋگتاردان ءبىر-بىر ادام كوميسسيانىڭ مۇشەسى بولۋى قاجەت. بۇل كوميسسيا اي سايىن جۇمىس ىستەمەيدى، جىلىنا ءبىر ىستەي مە، ەكى جىلدا ءبىر ىستەي مە. سول ۋاقىتتاردا جەرگە تىكەلەي قاتىسى بار، جەرمەن جۇمىس ىستەپ جۇرگەن ادامداردى ءاربىر اۋىلدىڭ جينالىسى بەكىتىپ، سول كوميسسياعا كىرۋى ءتيىس. سوندا بارلىق ادامداردىڭ قاتىسۋى بولادى. سونداي-اق اۋداندىق پروكۋرور كوميسسيانىڭ مۇشەسى مىندەتتى تۇردە بولۋى قاجەت. ول كوميسسيانىڭ زاڭدىلىعىن باقىلاۋتىن بولادى. وعان قوسا، قوعاملىق ۇيىمدار مەن بۇقارالىق اقپارات قۇرالدارى كوميسسيانىڭ جۇمىسىنا قاتىسۋى شارت. قىسقاسى، كوميسسيانىڭ ءۇشتىن ءبىر بولىگى عانا بيلىكتە، قالعانى قاراپايى حالىق بولۋى قاجەت دەپ سانايمىز، - دەگەن ساياساتتانۋشى كونكۋرستىق كوميسسيالاردىڭ قۇرامىنا كىرەتىن بيلىك وكىلدەرىنە حالىق سەنبەيتىنىن العا تارتتى.
دوس كوشىمنىڭ ايتۋىنشا، جەردى بولەتىن، وعان قاتىستى كونكۋرستى وتكىزەتىن كوميسسيانىڭ جۇمىسى اشىق ءارى جاريالى تۇردە بولۋى كەرەك. ساياساتتانۋشىنىڭ ايتۋىنشا، بۇل قولدانىستاعى ەرەجەدە قاراستىرىلماعان. وسىعان بايلانىستى، جەر بولۋگە قاتىستى كونكۋرستىق كوميسسيانىڭ جۇمىسىنا قىزىعۋشىلىق تانىتاتىن ازاماتتاردىڭ كەز كەلگەنى تولىق قاتىسا الۋى شارت.
بۇگىندە جەرگىلىكتى جەردەگى كوكۋرستىق كوميسسيالارعا قاتىستى ەرەجەلەرگە وزگەرىس ەنگىزگەن ءجون دەپ سانايتىن ساياساتتانۋشى كوميسسيانىڭ جۇمىسىن پروكۋرور باقىلاۋ وتىرۋى كەرەك دەپ ەسەپتەيدى.
«ەگەر كوميسسيا مۇشەلەرىنىڭ داۋىسى تەڭ بولسا، وندا ءتوراعانىڭ داۋىسى ەكى داۋىسقا يە بولادى» دەگەن باپقا نازار اۋدارعان دوس كوشىم بۇل باياعى ءارحايزمنىڭ قالدىعى ەكەندىگىن ايتا كەلە، «ادام قۇقىعىن بۇزاتىن مۇنداي نورما بولماۋى كەرەك. ءار ادام تەك ءبىر داۋىسقا يە بولۋى ءتيىس»، - دەدى.
