سەنبى كۇنى استانادا وتكەن جەر كوميسسياسىنىڭ وتىرىسى ادەتتەگىدەي باتىل مالىمدەمەلەر مەن قاتاڭ سىن، ەسكەرتپەلەرگە تولى بولدى. ونداي مالىمدەمەلەر تەك كوميسسياعا تۇراقتى مۇشە بولعان ساناۋلى جەر جاناشىرلارى تاراپىنان عانا ەمەس، جيىنعا كەلگەن بىلايعى جۇرت تاراپىنان دا، بيلىك پارتياسى وكىلدەرىنىڭ دە اۋزىنان شىعىپ جاتتى.

سونىڭ ءبىرى ءوزىن «نۇر وتان» مۇشەسى دەپ تانىستىرعان ايدىن ەگەۋبايەۆ اۋىلشارۋاشىلىق ماقساتىنداعى جەرلەردى شەت ەلدەرگە جالعا بەرۋ وتانعا وپاسىزدىق جاساۋمەن تەڭ ەكەنىن ايتىپ، جەر ءۇشىن نارازىلىق اكسيالارىن وتكىزگەن ازاماتتارعا قولداۋ ءبىلدىردى. ءسوزى بەكىتىلگەن رەگلامەنتكە سىيماي قالعان ول جيىن ءوتىپ ەاتقان ۇلتتىق مۋزەي دالىزىنە شىعىپ تاعى مالىمدەمە جاساعان.

ا. ەگەۋبايەۆ شىعىس قازاقستان وبلىسى ءۇرجار اۋدانىندا قىتايلىقتاردىڭ 45 پايىزدىق ۇلەسى بار بىرىككەن كومپانيا قىزمەت باستاعانىن، ونىڭ 8 مىڭ گا جەرگە سويا ەگىپ جاتقانىن، بىرىككەن كاسىپورىنعا قازاقستان تاراپىنان 6 ملرد تەڭگە، 20 ملن دوللار شەتەلدىك ينۆەستيسيا تارتىلعانىن جايىپ سالدى. ونىڭ ايتۋىنشا، كومپانيانىڭ 45 پايىز ۇلەسى قىتايلىق دجان ۆەيدونگ (Zhang Weidong) دەگەن ازاماتقا تيەسىلى كورىنەدى. مۇنداي قيتۇرقىلىققا ەلىمىزدىڭ زاڭناماسى توسقاۋىل قويمايدى، شەتەلدىكتەر ۇلەسى 49 پايىزدان اسپايتىن كومپانيالارعا ۋىلشارۋاشىلىق جەرلەرى جالعا بەرىلەدى.

«نۇر وتاندىق» وكىل ءقازىر قىتايدان قازاقستانعا قۇرامىندا 16 ادام بار دەلەگاسيا كەلگەنىن، ولار «ءباتۋا» كومپانياسىنىڭ ەنشىلە ۇيىمدارىنىڭ ەگىس القاپتارىن ارالاپ جۇرگەنىن ايتادى. ءتىپتى، دەلەگاسيا ساپارىنىڭ كەستەسىنە دەيىن تاۋىپ العان كورىنەدى.

«دەلەگاسيا ءۇرجار، ەلتاي اۋىلدارىندا، قوستاناي، پاۆلودار وبلىستارىندا، ستەپنوگورسك قالاسىندا بولادى ەكەن. ولار وندا نە ءۇشىن ءجۇر؟»، - دەگەن ا. ەگەۋبايەۆ پروكۋراتۋرا، ۇقك، «نۇر وتان» باسشىلىعى اتالعان فاكتىگە نازار اۋدارىپ، تەكسەرىس جۇرگىزۋى قاجەت دەيدى.