پاۆلودار وبلىسىندا ەرتىس وزەنىندە بالىقتىڭ قىرىلۋ سەبەپتەرى انىقتالىپ جاتىر. اقسۋ جانە ماي اۋداندارىندا بالىق جاعالاۋعا جاقىن ءجۇزىپ كەلىپ، ونى قولمەن ۇستاپ الۋعا بولادى، - دەپ حابارلايدى Qamshy.kz pavlodarnews.kz -كە سىلتەمە جاساپ.
بۇل تۋرالى بەينەنى بۇگىن قوعامشىل-ەكولوگ ەرجان ورازالينوۆ ءوزىنىڭ Facebook-گى پاراقشاسىندا جاريا ەتكەن. اۆتوردىڭ ايتۋىنشا، بەينە اقسۋ قالاسىنداعى قايىق ستانسياسى ماڭىندا تۇسىرىلگەن. بالىقشىلار جەكسەنبى كۇنى ەرتىستىڭ تۇبىندە قىزىل داقتار پايدا بولىپ، كەيىن بالىق جاعالاۋعا جاقىنداپ، كەيبىرەۋى سۋ بەتىنە قالقىپ شىعا باستاعانىن العا تارتتى.
ءدال وسىنداي جاعداي ماي اۋدانىندا دا ورىن الدى. جەر قويناۋىن پايدالانۋ، قورشاعان ورتا جانە سۋ رەسۋرستارى باسقارماسى باسشىسىنىڭ ورىنباسارى ايگەرىم قابىلتايەۆانىڭ ايتۋىنشا، ۆەدومستۆو ەكولوگيا جانە تۇتىنۋشىلار قۇقىعىن قورعاۋ دەپارتامەنتتەرىمەن بىرلەسىپ بالىقتارعا نە بولعانىن انىقتاپ جاتىر.
«تۇتىنۋشىلاردىڭ قۇقىعىن قورعاۋ دەپارتامەنتى راديولوگيالىق جانە اۋىر مەتاللداردىڭ مولشەرىن ءبىلۋ ءۇشىن سۋدىڭ ۇلگىسىن العان. ناتيجەسى ەرتەڭ تۇستەن كەيىن بەلگىلى بولادى. ورمان جانە اڭ اۋلاۋ شارۋاشىلىعى ينسپەكسياسى وقيعا بولعان جەرگە باردى، ءبىراق بالىقتىڭ قىرىلۋىن بايقامادى. ءبىز جاعدايدى باقىلاۋعا الدىق»، - دەدى ايگەرىم قابىلتايەۆا.
اقسۋ قالاسى اكىمىنىڭ ورىنباسارى قارشىعا ارىنوۆتىڭ پايىمداۋىنشا، ەكولوگيالىق اپات تۋرالى ايتۋعا ءالى ەرتە. -«الدىن الا بولجام بويىنشا بالىقتاردى سۋ بەتىنە شىعۋعا وتتەگىنىڭ جەتىسپەۋشىلىگى ماجبۇرلەپ وتىر. بۇل نەمەن بايلانىستى ەكەنىن ءالى انىقتاپ جاتىرمىز. بالىق پەن سۋدىڭ ۇلگىسى پاۆلودار قالاسىنداعى ۇلتتىق ساراپتاما ورتالىعىنا جىبەرىلدى. سۋعا قاتىستى ناتيجەنى ەرتەڭ الامىز، ال بالىق جونىندە اقپارات بەيسەنبى-جۇما كۇندەرى عانا دايىن بولادى. قالالىق سۋ ارناسى ءوز زەرتحاناسىندا ساعات سايىن سۋدىڭ قۇرامىن تەكسەرىپ وتىر. تالداۋ قورىتىندىسىنا سايكەس سۋ ىشۋگە جارامدى. نەگىزى، اعىپ جاتقان ەرتىس وزەنىنىڭ ۇلكەن بولىگىندە اتالمىش جاعداي تىركەلمەگەن، بۇل جاعداي كىشىگىرىم قويناۋدا ورىن الدى. ماماندار بولعان جاعدايدى جاقىندا سۋ دەڭگەيىنىڭ كوتەرىلىپ، تەز ارادا قايتا تۇسە باستاعانىمەن بايلانىستىرادى. دەگەنمەن، انىعىن ساراپتامادان سوڭ عانا ايتا الامىز»، - دەدى قارشىعا ارىنوۆ.
