كوكشەتاۋ قالاسىندا قۇرىلىس جۇمىستارىن جۇرگىزۋ بارىسىندا بالاباقشا ىرگەتاسىنان  ادام سۇيەكتەرى تابىلدى. وقيعا ورنىنا جەدەل جەتكەن انىقتاۋ توبى ءۇش ادامنىڭ باس سۇيەگى مەن وزگە دە قاڭقالاردى انىقتاعان، - دەپ حابارلايدى Qamshy.kz  31-ارناعا سىلتەمە جاساپ. 

جۇمىسشىلار بالا-باقشانىڭ ىرگەتاسىن تۇرعىزباقشى بولىپ، جەردى قازا باستايدى. كەنەت كۇتپەگەن جاعدايعا تاپ  بولادى. ەكى مەتر تەرەڭدىككە جەتكەندە، ادام سۇيەكتەرى جاتقاندىعىن بايقاعان. شاقىرتۋمەن وقيعا ورنىنا جەدەل-انىقتاۋ توبى جەتەدى. ولار  ءۇش ادامنىڭ باس سۇيەك، قاڭقالارىنان بولەك،  قۇمىرا ىدىس، اشەكەي بۇيىم مەن شىرىگەن تاقتايشالاردى تاپقان. ماماندار،  بۇل  ەجەلگى ادامداردىڭ سۇيەگى بولۋى مۇمكىن دەيدى. ءبىر قىزىعى ادام قاڭقالارى جەر استىنداعى قۇبىر جۇيەسىنىڭ قاسىنان تابىلعان. بۇعان  دەيىن ەشكىمنىڭ بايقاماعانى كۇمان تۋعىزادى. قازىرگى كەزدە سۇيەكتەر ءمايىتحانادا زەرتتەلۋدە.  

گۇلنار پينچۋك، اقمولا وبلىستىق ىشكى ىستەر دەپارتامەنتى باسپا ءسوز قىزمەتىنىڭ جەتەكشىسى:

- سۇيەكتەردى قوزعاعان كەزدە بىردەن ۇگىتىلە باستادى. تەك باس سۇيەكتەرىن الا الدىق. سوت-مەديسينالىق ساراپشىسىنىڭ ايتۋىنشا ادام قاڭقالارى جەر استىندا ۇزاق ۋاقىت بويى جاتقان. قازىرگى كەزدە ساراپتاما تاعايىندالدى، انىقتاۋ جۇمىستارى جۇرگىزىلۋدە.