دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا، جىل سايىن 80 ميلليونعا جۋىق ايەل جوسپارسىز جۇكتى بولىپ، سولاردىڭ 20 ميلليونى جاساندى تۇسىك جاساتۋعا بارادى ەكەن. ەلىمىزدى دە بۇل ماسەلە سىرت اينالىپ وتپەدى. قازاقستان مەملەكەت بولعالى ءوز وتانىمىزدا 4 ميلليوننان استام ابورت جاسالعان. ول تەك جاي عانا ابورت ەمەس، انانىڭ دەنساۋلىعى مەن بالانىڭ ومىرىنە بالتا شابۋ، - دەپ جازادى Qamshy.kz 31 ارناعا سىلتەمە جاساپ.

الەۋمەتتىك تاقىرىپتاردى قىلقالامىنا ارقاۋ ەتكەن اڭساعان مۇستافانىڭ جۇمىستارى بۇگىندە بىرنەشە تىلگە اۋدارىلىپ، الەۋمەتتىك جەلىلەردە كەڭ تالقىلانىپ ءجۇر. سۋرەتشىنىڭ گرافيكا "ماما، مەنى ولتىرمەشى!" اتتى جۇمىسىن 2 مىڭعا جۋىق ينتەرنەت قولدانۋشى كوشىرىپ باسىپ، ابورت تاقىرىبىنا قاتىستى پىكىر قالدىرعان ەكەن. اراسىندا سويلەيتىن سۋرەتتەردەن اسەرلەنىپ، جاساندى تۇسىكتەن باس تارتقان بويجەتكەندەر دە بولعان. ءتىپتى اۆتورعا العىسىن ايتىپ، بالاسىنىڭ ءومىرىن ساقتاپ قالعانى ءۇشىن "كىندىك شەشە" ەتىپ سايلاعاندارى بار.

-ەندى نە ىستەيمىن ابورت جاساۋعا تۋرا كەلەدى-اۋ دەپ، 2 اپتاداي دەپرەسياعا ءتۇسىپ جاتتىم -دەيدى ۇيدە. قوزعالماي، تاماقتى دا ىشپەي، ەشتەڭكە كورمەي. جاساندى تۇسىك جاساۋ كەرەك دەپ شەشىم قابىلدادىم، سوسىن ينتەرنەتكە كىرە سالايىنشى دەپ، فەيسبۋكقا كىرىپ قالعان كەزدە جاڭاعى سۋرەت الدىمنان شىعا كەلدى -دەيدى دا، "ماما مەنى ولتىرەتىن شىعار" دەگەن. سونى كوردىم دا، ىشىمدەگى بالاپانىمنان كەشىرىم سۇراپ، جىلاپ، ءسويتىپ ويىمنان اينىپ ونى دۇنيەگە كەلتىردىم -دەيدى. ءبىر التى ايلىق حودۋنوكتا وتىرعان بالانىڭ فوتوسىن سالىپ جىبەردى ماعان، - دەيدى سۋرەتشى اڭساعان مۇستافا.

ال پسيحولوگ اننا مەرگەنبايەۆا ەر جەتىپ، بويجەتىپ كەلە جاتقان ۇل-قىزدارمەن اشىق اڭگىمەلەسىپ، ءينتيمدى ءومىر زاڭدىلىقتارىن بۇكپەي اتا-اناسى ءتۇسىردىرۋ كەرەك -دەيدى. مامان پىكىرىنشە، قىز اناسىمەن سىرلاس بولماسا، باسىنا تۋعان جاعدايدى ىشتەي تىنىپ، ءوزى جالعىز شەشۋگە تىرىسادى ەكەن. ال قادامىن شالىس باسىپ، اداسقان قىزدارىمىزدان جاقىندارى كەرى اينالماي، قولداۋ كورسەتىپ، ەرىمەن تابىستىرىپ كورگەنى ابزال -دەيدى پسيحولوگ.   

- قاتىگەز اتا-انالار ءسال ويلانسا، مۇمكىن ءبىز ءقازىر اجەتحاناعا بالانى تاستامايتىن با ەدىك، ءبىزدىڭ قىزدار ابورت جاسامايتىن با ەدى، مۇمكىن سول جىگىتتەر قاشىپ كەتپەي شەشەسىنەن قورقىپ، كەلىپ ۇيلەنەتىن بە ەدى. ول جىگىتتەردىڭ دە كەي كەزدە شەشەلەرى قارسى بولادى عوي، انا قىزدىڭ بەتى جامان، مىنا قىزدىڭ رۋى جامان، بولمايدىشى، بولمايدى دەپ. ال ءبىراق سول جىگىتتەردىڭ بىرەۋى كەيىن ناركومان بولىپ كەتەدى، ەكىنشىسى ماسكۇنەم بولىپ كەتەدى، سۋيسيد جاسايدى، - دەگەندى ايتادى پسيحولوگ اننا قۇدياروۆا.     

سۋرەتشى اڭساعان مۇستافانىڭ سوڭعى ەڭبەگىندە اناسىنىڭ جۇرەگىنە جارماسىپ، ونى قۇشاقتاپ جاتقان ءسابيدىڭ سۋرەتى مەن ارتىنان ءتونىپ كەلە جاتقان حيرۋرگيالىق قىسقىش بەينەلەنگەن. مەديسينادا ونى بالانىڭ پورشا-پورشاسىن شىعارىپ، جاتىردان ونى بولشەكتەپ الىپ تاستاۋ ءۇشىن قولدانادى. اۆتور بۇل ەڭبەگى وزگە سۋرەتتەرى سياقتى كوپ انانىڭ سانا-سەزىمىن وياتار دەگەن سەنىمدە.