قازاقستاندىق ينتەرنەت قولدانۋشىلارىنىڭ اراسىندا وتە تانىمال  Yvision.kz بلوگ-پلاتفورماسىندا دانا (Dana1992) ەسىمدى قولدانۋشىنىڭ بلوگى قىزۋ تالقىعا ءتۇستى. ءوزىن ءىرى كاسىپكەردىڭ توقالى دەپ تانىستىرعان دانا ەسىمدى بويجەتكەن  ايەل بولۋدان توق توقال بولعان ارتىق ەكەنىن تۇسىنگەنىن ايتادى.

استانادان الماتىعا جۇمىس بابىمەن كەلگەن كاسىپكەرمەن تانىسقان بويجەتكەن، بىرنەشە كەزدەسۋدەن كەيىن ونىڭ وتباسىلى ەكەنىن بىلەدى. الايدا قارىم-قاتىناسىن ۇزبەيدى، "كوڭىلدەسىم بول" دەگەن ەر ادامنىڭ ۇسىنىسىن قابىلداپ، ەركە توقال قالاعانىن جاساتاتىن جاعدايعا جەتەدى.

"ايەلگە ءتان قالاۋىمنىڭ بارلىعىن وڭاي-اق الامىن. سومكە، تۋفلي نەمەسە ودان دا قىمباتىراق زاتتى الا الامىن. وسى ۋاقىتتان بەرى كولىك الدىق، شەتەلدە دەمالدىق. ونىڭ كومەگىمەن ءبىر بولمەلى پاتەرىمدى جاڭادان سالىنعان ۇيدەگى پاتەرگە اۋىستىردىق. ارينە، جوندەۋىن دە ءوزى كوتەردى. ونىڭ توننالاپ سىيلاپ جاتقان اشەكەي-بۇيىمدارى جايلى ايتۋدىڭ ءوزى ارتىق" دەگەن كوڭىلى توق توقال ءوزى قاتارلى جاس جىگىتتەرگە تەك جاس كەزىندە قىزىققانىن، ءقازىر وتباسىلى بولسا دا، قالتالى ازاماتتاردىڭ ۇنايتىنىن ايتادى.

"ەرەسەك ەركەكتەردە اقشا دا بار، اقىل دا بار، ايەلدەرمەن ءوزىن قالاي ۇستاۋ كەرەكتىگىنەن تاجىريبە دە جەتكىلىكتى"، - دەپ جازادى دانا.

"تۇسىنەسىزدەر مە، ونىڭ استانادا ميىن جەيتىن ايەلى، ىعىرىن شىعاراتىن بالا-شاعاسى بار. ال ماعان الماتىعا كەلگەندە ءلاززاتقا باتىپ دەمالادى. ءبىز ونىڭ وتباسى، جۇمىسى تۋرالى تالقىلايمىز. ارنايى جەرلەرگە قولتىقتاسىپ بىرگە بارامىز. سوندىقتان وعان ەكى ايەلمەن دە ىڭعايلى دەپ ويلايمىن" دەپ جازادى توقال دانا.

جانە كوڭىلدەسى استانادا ءوز وتباسىنىڭ جانىندا كەزىندە باسقا جىگىتتەرمەن كوڭىل كوتەرەتىنىن جاسىرماعان بويجەتكەن بۇل ىسىنە ۇيالمايتىنىن دا اشىق ايتتى.

دانا ءوز وتباسىنىڭ بۇل ىستەن حابارى جوعىن، تەك قالتالى سۇيىكتىسى بارىن عانا بىلەتىنىن ايتا كەلە، "مەن سياقتىلار توزاق وتىنان دا قۇتىلۋدىڭ امالىن تابادى" دەپ ماقتانىپ تا العان.

جەلى قولدانۋشىلارىنىڭ ءبىر تاراپى بويجەتكەندى اقىلعا شاقىرسا، ەندى ءبىر تاراپى قولدايتىندارىن بىلدىرگەن. ءتىپتى اراسىندا بۇل اڭگىمەنىڭ وتىرىككە قۇرىلعانىن ايتاتىندار دا بار.

وسى ورايدا "قامشى" پورتالى ءوز وقىرماندارىن ەكىنشى ايەلدى زاڭداستىرۋ مەن توقال ماسەلەسىن بىرگە تالقىلاۋعا شاقىرادى.