كەلەسى جىلى شىعىس قازاقستان وبلىسىنىڭ ورتالىعىنداعى حالىقارالىق اۋەجايدا ساعاتىنا 200 ادامدى قابىلداي الاتىن جاڭا جولاۋشىلار تەرمينالى پايدا بولادى، - دەپ حابارلايدى Qamshy.kz.
بۇل تۋرالى ايماق باسشىسى دانيال احمەتوۆ وبلىستىق ءماسليحات دەپۋتاتتارىنىڭ الدىنداعى ەسەبىندە حابارلادى.
جاڭا تەرمينال وسكەمەننىڭ اۋە ايلاعىنا ادامدارعا حالىقارالىق ستاندارتتارعا ساي قىزمەت كورسەتۋگە مۇمكىندىك بەرەدى.
– جولاۋشىلار ۇشاقتان ءتۇسىپ، كەڭەس زامانىنداعىداي ساعاتتاپ كەزەكتە تۇرۋ تاجىريبەسىن توقتاتۋ قاجەت، – دەدى شقو اكىمى دانيال احمەتوۆ. – وسكەمەن اۋەجايى حالىقارالىق ستاندارتتارعا ساي بولۋ كەرەك. ءبىز جوبانى «ەرتىس» الەۋمەتتىك-كاسىپكەرلىك كورپوراسياسى ارقىلى قارجىلاندىرىپ، الداعى ۋاقىتتا قۇرىلىس جۇمىستارىن باستايمىز.
جوبالىق قۇجاتتامالارعا ساي قۇرىلىس جۇمىستارىنىڭ مەرزىمى 7 ايدى قۇراماق. قازىرگى ۋاقىتتا كونكۋرستىق شارالار جۇرگىزىلۋدە.
مامانداردىڭ ايتۋىنشا، جاڭا تەرمينال قولدانىسقا بەرىلگەن سوڭ وسكەمەن اۋەجايىنان ۇشۋ باعىتتارىنىڭ سانىن ارتتىرۋعا، جاڭا اۆياتاسىمالداۋشى كومپانيالاردى تارتۋعا، «قازاقستان – ەۋروپا – وڭتۇستىك-شىعىس ازيا مەملەكەتتەرى» باعىتتارىنداعى ترانزيتتىك اۋە كەمەلەرىن قابىلداۋعا مۇمكىندىك تۋماق. سونىمەن قاتار كورسەتىلەتىن قىزمەتتىڭ ساپاسى ارتىپ، ازاماتتىق اۆياسيانىڭ حالىقارالىق ۇيىمىنىڭ تالاپتارىنا سايكەس جولاۋشىلار قاۋىپسىزدىگىن قامتاماسىز ەتۋگە مۇمكىندىك تۋادى.
