15 شىلدەدە تۇركيا پرەمەر-مينيسترى بينالي يىلدىرىم ەلدە اسكەري توڭكەرىلىس ارەكەتى بولعانى تۋرالى مالىمدەمە جاسادى، - دەپ حابارلايدى Qamshy.kz Tengrinews.kz -كە سىلتەمە جاساپ.

بۇل تۋرالى ريا نوۆوستي حابار تاراتتى.

"اسكەري ادامدار توبى وزدەرىنە بەرىلگەن قۇزىرەت مەن قارۋدى پايدالانا وتىرىپ، قۇقىققا قايشى ارەكەت جاساماق بولدى... مۇنى توڭكەرىلىس دەپ ايتۋ دۇرىس ەمەس شىعار، ءبىراق قانداي جاعداي بولسا دا، ءبىزدىڭ ازاماتتارىمىز تىنىشتىقتا ءومىر ءسۇرۋى كەرەك، ءبىز بەيبىتشىلىك پەن ءتارتىپتى ساقتاۋ ءۇشىن قولدان كەلگەندى جاسايمىز. كىنالى ادامدار ەڭ قاتال جازا الادى"، - دەپ مالىمدەدى تۇرىك ۇكىمەتىنىڭ باسشىسى NTV تەلەارناسىنىڭ ەفيرىندە تەلەفون ارقىلى.

حالىقارالىق اگەنتتىكتەردىڭ مالىمەتىنشە، انكارادا اتىستار ەستىلگەن، قالا ۇستىندە جويعىش ۇشاقتار مەن تىكۇشاقتار ۇشىپ ءجۇر، ال ىستامبۇلداعى اۋەجايعا تانكتەر جەتكىزىلگەن. ەلدە مەملەكەتتىك تەلەارنالار حابار تاراتۋىن توقتاتتى. انكارادا Facebook جانە Twitter الەۋمەتتىك جەلىلەرى قۇلىپتالدى.

سونىمەن قاتار تۇركيا استاناسىندا اسكەري تىكۇشاقتىڭ ۇلتتىق بارلاۋ قىزمەتىنىڭ عيماراتىنىڭ ماڭىندا وق اتقانى حابارلانىپ وتىر. اسكەريلەر بوسفور ارقىلى كوپىرلەردى قورشاۋعا الدى. كۋاگەرلەر جەلىگە سۋرەتتەر مەن ۆيدەولاردى جاريالاپ جاتىر.