تانىمال سازگەر، اقىن ءارى ءانشى ەركەش شاكەيەۆ الماتىدا جوعالىپ كەتكەن 25 جاستاعى ۇلى سافار شاكەيەۆتى تابۋعا جاردەمدەسۋدى سۇرادى، - دەپ حابارلايدى Qamshy.kz.

«دوستار، مەنىڭ ۇلىم سافار شاكەيەۆ جوعالىپ كەتتى. ول 16 شىلدە كۇنى تاڭعى 7-لەردە جوعالدى. سوڭعى رەت ونى سەيفۋللين كوشەسىمەن جوعارى ال-فارابيدەن ءوتىپ بارا جاتقاندا كورگەن. رەميزوۆكا اۋدانىنا قاراي بەت العان بولاتىن. بويى 187 سم. ۇستىندە وسى قىزعىلت جەيدە مەن كوك دجينسى بولدى. بۇگىن كورگەن ادامدار بولسا نەمەسە قاندايدا ءبىر اقپاراتى بار ادامدار تابىلىپ جاتسا، جەكە حابارلاما ارقىلى حابارلاسسىن نەمەسە وسىندا پىكىر قالدىرسىن. مەيلىنشە، كوپ رەپوست جاساڭىزدارشى، ءوتىنىش. مىنا نومىرلەرگە حابارلاسىڭىزدار - 87082214007، 87025658889، 87754788771، 87017663616»، - دەپ جازدى ە.شاكەيەۆ Facebook-تەگى پاراقشاسىندا. 

س.شاكەيەۆتىڭ دوستارى حابارلاعانداي، تۋعان-تۋىستارى الماتى ىىد-نە ارىز جازعان، قازىرگى ۋاقىتتا ىزدەۋ جۇمىستارى جۇرگىزىلىپ جاتىر.

ءىز-تۇزسىز جوعالعان سافار شاكەيەۆتى 50 پوليسەيدەن تۇراتىن ءموبيلدى توپ ىزدەۋدە. بۇل تۋرالى قالالىق ءىىد باسپا ءسوز قىزمەتىنەن حابارلادى.

ەركەش شاكەيەۆتىڭ ۇلىن ىزدەستىرۋگە ەرىكتىلەر قاجەت.

بۇل تۋرالى بۇگىن فەيسبۋك الەۋمەتتىك جەلىسىندەگى جەكە پاراقشاسىندا الماتى قالالىق قوعامدىق كەڭەسىنىڭ مۇشەسى بەكنۇر قيسىقوۆ ءمالىم ەتتى.

«سافار شاكەيەۆ ىزدەستىرىلىپ جاتىر. ازىرگە ناتيجە جوق. تابىلادى  دەگەن ۇمىتتەمىز. تولە بي كوشەسى مەن ەسەنتاي وزەنىنىڭ قيىلىسقان اۋماعىنان  ىزدەۋ كەرەك. بىزگە ەرىكتىلەر كەرەك بولىپ جاتىر»، - دەپ جازادى ب. قيسىقوۆ.  

ىزدەستىرۋ ءوندىرىسى اياسىندا مەدەۋ اۋداندىق ءىىب بولىمشەسىنىڭ قىزمەتكەرلەرى جانە الماتى قالالىق ءىىد كريمينالدى پوليسيا باسقارماسىنىڭ وكىلدەرىنەن ارنايى تەرگەۋ-جەدەل توبى قۇرىلدى. سونداي-اق، ىزدەۋ شاراسىنا 15 ۋچاسكەلىك پوليسيا قىزمەتكەرلەرى دە جۇمىلدىرىلعان.

بۇگىن كومپوزيتور ەركەش شاكەيەۆتىڭ ۇلى سافار شاكەيەۆتىڭ قايدا ەكەنىن ايتقان ادامعا 10 ملن. تەڭگە سىياقى بەرىلەتىندىگى حابارلاندى.