اۋرۋحانانىڭ جانساقتاۋ بولىمىندە جول-پاترۋلدىك پوليسياسىنىڭ مامانداندىرىلعان باتالونى قىزمەتىنىڭ اعا ينسپەكتورى پوليسيا لەيتەنانتى تيمۋر بەگاسىلوۆ قايتىس بولدى، - دەپ حابارلايدى Qamshy.kz قالالىق ءىىد باسپا ءسوز قىزمەتىنە سىلتەمە جاساپ.
"ول جول-پاترۋلدىك پوليسياسىنىڭ وزىندىك قاۋىپسىزدىك ەكيپاجىنىڭ قۇرامىندا ابىلاي حان داڭعىلىندا قىزمەتىن اتقارعان. ازامات رۋسلان كۇلەكبايەۆتىڭ زاڭعا قايشى ارەكەتىنە تويتارىس بەرۋ كەزىندە تيمۋر بەگاسىلوۆقا وق تيگەن. جمكا-عا پوليسەي اسا اۋىر جاعدايدا ءتۇستى. دارىگەرلەر ونىڭ ءومىرىن امان الىپ قالۋ ءۇشىن بارىن سالىپ كۇرەستى"، - دەلىنگەن ءىىد تاراتقان حابارلامادا.
پوليسيا لەيتەنانتى بەگاسىلوۆ تيمۋر تىلەۋ ۇلى 25.07.1986 جىلعى، ول قۇقىق قورعاۋ ورگاندارىندا 2015 جىلدىڭ قاڭتارىنان باستاپ قىزمەت ەتكەن.
ايتا كەتەيىك، بۇعان دەيىن، الماتىداعى اتىس كەزىندە ءۇش پوليسيا قىزمەتكەرى مەن ءبىر بەيبىت تۇرعىن قازا تاپقان بولاتىن.
سونداي-اق، الماتىدا بولعان تەراكتىدەن قازا تاپقانداردىڭ وتباسىنا 15 ميلليون تەڭگەدەن، ال زارداپ شەككەندەردىڭ وتباسىنا بەس ميلليون تەڭگەدەن بەرىلەتىنىن حابارلاعان بولاتىنبىز.
