ونى قىلمىسقا نە يتەرمەلەدى؟ كۇلەكبايەۆقا جاقىندارى، ۇستازدارى مەن كورشى-قولاڭى قانداي مىنەزدەمە بەرەدى؟ «حابار» ارناسىنىڭ تىلشىلەرى وسى سۇراقتارعا جاۋاپ ىزدەپتى. بۇل تۋرالى Qamshy.kz حابارلايدى.
كەشە الماتىدا ىلاڭ سالعان 27 جاستاعى رۋسلان كۇلىكبايەۆ قىزىلوردا وبلىسى بايقوڭىر قالاسىنىڭ تۋماسى. جۇلدىزدى قالاشىقتاعى №8 مەكتەپتە 9 جىل ءبىلىم العان. بۇرىنعى ۇستازدارىنىڭ سوزىنشە، ساباق ۇلگەرىمى ورتاشا، تاربيەسى دە الاڭداۋشىلىق تۋدىرماعان.
گۇلنار قوجاعۇلوۆا، بايقوڭىر قالاسى №8 ورتا مەكتەبىنىڭ وقۋ ءىسى مەڭگەرۋشىسى:
-رۋسلان ءبىزدىڭ مەكتەپتە 2006 جىلى 9-سىنىپتى ءبىتىردى. ودان كەيىن كاسىپتىك ۋچيليششەگە تۇسكەن بولاتىن. جالپى مەكتەپتە دە ءتارتىبى ايتارلىقتاي جامان بولعان جوق. ءوزىن جاقسى جاعىنان كورسەتە ءبىلدى. ساباق ۇلگەرىمى ورتاشا دەپ ايتا الامىن. رۋسلاننىڭ وسىنداي جاعدايعا بارۋى، بۇل قالاي بولدى دەگەن سۇراق ءبىزدى قاتتى تولعاندىردى. بارلىعىمىز، مۇعالىمدەر مەكتەپ بولىپ قينالىپ كەتتىك. ءتىپتى نە ويلارىمىزدى دا بىلگەن جوقپىز.
الماتى وبلىسىنىڭ ىنتىماق اۋىلىندا بولسا كۇلىكبايەۆتىڭ قايىن جۇرتى تۇرادى. ءبىراق قىلمىسكەر ايەلى مەن بالا-شاعاسىن الىپ كەتكەن. قۇقىق قورعاۋ قىزمەتكەرلەرى ونىڭ زايىبىنان تۇسىنىك الۋ ءۇشىن بايقوڭىردان شاقىرتتى. ءقازىر ول الماتىدا. ىنتىماقتا 5-6 جىل تۇراتىن كورشىلەرى كۇدىكتى وسى ۋاقىت ارالىعىندا كەلمەگەنىن ايتادى. ولار ونىڭ ءجۇزىن تەك كەشەگى جاعدايدان كەيىن جاڭالىقتاردان كورگەن.
نۇرمۇحانبەت يساتايەۆ، اۋىل تۇرعىنى:
-5-6 جىل بولدى تۇرعانىما. ەشقاشان كورگەن جوقپىن.
قۇرىقتالعاننىڭ ارەكەتىن پسيحولوگ ماماندار تالداۋعا تىرىستى. «كوپبالالى وتباسىنان شىققان، ءوزى دە ەكى بالانىڭ اكەسى بولا تۇرا بۇنداي قادامعا بارۋى ۇلكەن پسيحولوگيالىق اۋىتقۋشىلىقتىڭ بەلگىسى»، – دەيدى مامان.
زارينا شتەەر، پسيحولوگ:
-ونىڭ ءدال وسى سۋرەتتەگى بەت-بەينەسىن تالداساق، ليدەرلىك قاسيەتى جوق، ايتقاندى ىستەيتىن ادام دەگەن سيپات بەرەر ەدىم. تۇرىنەن قوبالجۋ، قينالۋ نە جاساعان ىسىنە قايعىرۋ دا بايقالمايدى. ەسىرتكى قولداناتىن ادامعا ۇقسامايدى. ءبىراق كەكشىل، اشۋشاڭ ادام سياقتى. وندايلار پسيحيكالىق اۋىتقۋعا بەيىم كەلەدى.
كۇلىكبايەۆ بۇعان دەيىن بىرنەشە رەت سوتتى بولعانى بەلگىلى. سوڭعى رەت اتىس قارۋىن زاڭسىز ساقتاعانى ءۇشىن تەمىر تورعا جابىلعان. وتكەن جىلى جازاسىن وتەپ شىققان.
سالتانات مۇراتوۆا، وبلىستىق ءىىد مەملەكەتتىك ءتىل جانە اقپارات ءبولىمىنىڭ جەتەكشى مامانى:
-وتكەن جىلى، ياعني 2015 جىلى جازاسىن وتەپ شىقتى. مالىمەتتەرگە سۇيەنسەك، ول قازىرگى تاڭدا، ياعني وسى ۋاقىتقا دەيىن الماتى وبلىسىندا تۇرىپ كەلگەن. الايدا سەمياسى، 2 بالاسى جانە ايەلى بايقوڭىر قالاسىندا تۇرۋدا.
ۇلتتىق قاۋىپسىزدىك كوميتەتىنىڭ دەرەكتەرى بويىنشا، رۋسلان كۇلىكبايەۆ سوڭعى كەزدە الماتى وبلىسى ىلە اۋدانى ىنتىماق اۋىلىندا تۇرعان. ۇيالى تەلەفون ساتۋمەن اينالىسقان. 2010 جىلى 27 تامىزدا شىمكەنت قالاسى ەڭبەكشى اۋداندىق سوتىنىڭ ۇكىمىمەن قىلمىستىق كودەكستىڭ 178-بابى 2-بولىگى بويىنشا سوتتالعان. 2012 جىلى 8 مامىردا قىزىلوردا وبلىستىق سوتى قك-نىڭ 251-بابى بويىنشا 2 جىلعا جانە 11 ايعا باس بوستاندىعىنان ايىرعان. ءقازىر ءىستى ۇقك ءوز باقىلاۋىنا الدى. ال ىشكى ىستەر مينيسترلىگى مالىمەتىنشە، رۋسلان كۇلىكبايەۆقا قاتىستى قىلمىستىق كودەكسىنىڭ 8-بابى بويىنشا ءىس قوزعالىپ، سوتقا دەيىنگى تەرگەۋ امالدارى باستالدى.
