جەمقورلىق قىلمىستار جاسادى دەپ ايىپتالىپ، سەگىز جىلعا باس بوستاندىعىنان ايرىلعان بۇرىنعى پرەمەر-مينيستر سەرىك احمەتوۆتىڭ قىلمىستىق ىسىندە سوت شەشىمىمەن تاركىلەنۋى ءتيىس مۇلىكتىڭ ءتىزىمى بولماي شىققان، - دەپ حابارلايدى  Qamshy.kz informburo.kz-كە سىلتەمە جاساپ.

سوتتالعان س. احمەتوۆتەن تاركىلەنەتىن ەشتەڭە جوق ەكەنى سوت ورىنداۋشىلارى سوت شەشىمىن جۇزەگە اسىرۋعا كىرىسكەندە بەلگىلى بولعان.

س. احمەتوۆكە قاتىستى سوت ۇكىمىندە تاركىلەنۋگە جاتاتىن مۇلىك ءتىزىمىنىڭ جوقتىعى كەزەكتى سوت بارىسىندا انىقتالعان.

سوت ورىنداۋشى ءىس جۇزىندە احمەتوۆكە تيەسىلى دەلىنگەن «توپار جىلىجايلارى» جشس-نان ونىڭ ۇلەسىن ءبولىپ بەرۋدى سۇراپ سوتقا ءوتىنىش بەرگەن. سۋديا بولسا ۇكىمنىڭ تۇسىنىكىز تۇستارىن ءتۇسىندىرۋ تۋرالى قاۋلى شىعارىپ، سەرىكتەستىكتىڭ 95 پايىز ۇلەسى س. احمەتوۆكە، قالعانى بۇرىنعى ديرەكتورى الەكساندر زابيروۆقا تيەسىلى ەكەنىن كورسەتكەن.

الايدا، پروكۋراتۋرا سوت قاۋلىسىنا نارازىلىق ءبىلدىرىپ، كاسىپورىندى تۇگەلدەي  س. احمەتوۆكە تيەسىلى دەپ تانۋدى تالاپ ەتكەن. وسى جەردە جىلىجايدىڭ تاركىلەنۋگە جاتپايتىنى، ءتىپتى، تاركىلەنەتىن مۇلىكتەر ەنگىزىلگەن ءتىزىمنىڭ جوقتىعى انىقتالعان. بۇل تۋرالى سوتتا مۇددەلى تاراپ «قازاگروقارجى» اق (جىلىجاي اتالعان اق-دا كەپىلدە تۇرعان – رەد.) وكىلى حابارلاعان. جىلىجاي تاركىلەنگەن جاعدايدا «قازاگروقارجى» كەپىلزاتتان جانە جىلىجايعا بۇرىن بەرىلگەن قارجىنىڭ قايتارىلۋ مۇمكىندىگىنەن ايىرىلاتىن كورىنەدى.

«احمەتوۆكە قاتىستى سوت ۇكىمىندە تاركىلەۋگە جاتاتىن ءبىرقاتار مۇلىكتەر جوق. سونىمەن قاتار، كەپىلزاتتى جوعالتقان جاعدايدا «توپار جىلىجايلارى» ج ش س بۇرىن الىنعان قارجى مەن جىلىجاي قۇرالدارىنىڭ ليزينگىن قايتارۋ مۇمكىندىگىنەن ايىرىلاتىنىن، سونىڭ سالدارىنان مەملەكەتكە «قازاگروقارجى» اق ارقىلى كولەمدى نۇقسان كەلەتىنىن ەسككەرۋىڭىزدى سۇرايمىن. ويتكەنى، جىلىجاي كەشەنىنىڭ قۇرىلىسىنا قاراجات ۇلتتىق قوردان بولىنگەن»، - دەيدى «قازاگروقارجى» اق وكىلى جاننا تاعاناسوۆا.

سوت ناتيجەسىندە سۋديا «قازاگروقارجى» اق-عا جاقتاسىپ، ۇكىمدى ءتۇسىندىرۋ تۋرالى قاۋلىنىڭ كۇشىن جويعان. ءسويتىپ، سوت ورىنداۋشىلارىنىڭ «توپار جىلىجايلارى» جشس-داعى ۇلەستى ءبولۋ تۋرالى سوتقا ءوتىنىشى قاناعاتتاندىرىلماعان. وسىلايشا، سوت ورىنداۋشىلارى تاركىلەمەك بولعان جالعىز مۇلىككە سوت تىيىم سالىپ وتىر.

وسى جاعدايعا بايلانىستى تۇسىنىك بەرگەن قاراعاندى وبلىستىق سوتىنداعىلار  ءىستى تەرگەۋ كەزىندە كەمشىلىكتەردىڭ ورىن العانىن ايتقان.

«ۇكىمدە تاركىلەنۋگە جاتاتىن مۇلىكتەر ءتىزىمى بولمادى. ويتكەنى، ول ءتىزىم سوتقا ۇسىنىلعان تەرگەۋ ماتەريالدارىنا تىركەلمەگەن. بارلىق سۇراقتار تەرگەۋگە قاتىستى»، - دەپتى وبلىستىق سوتتىڭ باسپا ءسوز قىزمەتى.

ەستەرىڭىزگە سالساق، س. احمەتوۆ وتكەن جىلى جەلتوقسان ايىندا سوت شەشىمىمەن 10 جىلعا باس بوستاندىعىنان ايرىلدى. بيىل 14 ناۋرىزدا اپەللياسيالىق شاعىمدى قاراعان سۋديا ەكس-پرەمەردىڭ جازاسىن 8 جىلعا دەيىن قىسقارتقان بولاتىن. اپەللياسيالىق سوت وتىرىسى الدىندا س. احمەتوۆتىڭ تۋىستارى مەن دوستارى مەملەكەتكە كەلتىرىلدى دەلىنگەن 2 ميلليارد 200 ميلليون تەڭگەنى قازىناعا قايتارعان بولاتىن. ءقازىر س. احمەتوۆ قاراعاندى وبلىسى قاراباس ەلدى مەكەنىندەگى تۇزەۋ مەكەمەسىندە جازاسىن وتەۋدە.

س. احمەتوۆ ءىسى بويىنشا بارلىعى 21 ادام تەرگەۋگە الىنىپ، ايىپ تاعىلدى. ەكس-پرەمەرمەن بىرگە سوتتالعان قاراعاندى وبلىسىنىڭ بۇرىنعى اكىمى باۋىرجان ابدىشيەۆ پەن قاراعاندى قالاسىنىڭ بۇرىنعى باسشىسى مەيرام سماعۇلوۆ، قاراعاندى قالاسى جەر قاتىناستارى ءبولىمىنىڭ بۇرىنعى باسشىسى ەرنار دارىبەكوۆ مەرزىمىنەن بۇرىن بوستاندىققا شىقتى.