الماتىداعى قازاقستان رەسپۋبليكاسى مەملەكەتتىك ورتالىق مۋزەيى استانا قالاسىندا «ق ر موم قورىنداعى قارۋ-جاراق جانە ات ابزەلدەر كوللەكسياسى» اتتى كورمە وتكىزۋدە،  - دەپ حابارلايدى Qamshy.kz.

كورمەگە ق ر موم قورىنداعى XVIII-XX  عاسىرلارمەن مەرزىمدەلەتىن ات ابزەلدەرى، سۋىق قارۋ، اتۋ جانە وق دارىمەن اتىلاتىن قارۋلار، سونداي-اق ولاردى قولدانۋدا قاجەتتى سان الۋان جابدىق تۇرلەرى  - شاراينا، قالقان، ساۋىت جانە كىسە بەلدىكتەر قويىلعان. سونىمەن قاتار، كورمە ەكسپوزيسياسىنا قازاق تاريحىندا ەسىمى بەلگىلى تۇلعالار – امانگەلدى يمانوۆ، پۋبليسيست، ەتنوگراف، فولكلورتانۋشى ءماشھۇر-جۇسىپ كوپەيەۆ، مەملەكەت قايراتكەرى ءا.جانگەلدين، سونداي-اق 1916 جىلعى تورعاي، جەتىسۋ وڭىرىندەگى ۇلت-ازاتتىق كوتەرىلىس، 1929-1930 جج. سوزاق كوتەرىلىسىنە قاتىسۋشىلارمەن بايلانىستى قارۋ-جاراقتار، قازاقستاننىڭ حالىق جازۋشىسى م.ءماعاۋيننىڭ مۋزەي قورىنا 2014 جىلى وتكىزگەن قامشىلارى دا قويىلعان.