تانىمال سازگەر ەركەش شاكەيەۆ الماتىدا جوعالىپ كەتكەن 25 جاستاعى ۇلى سافار شاكەيەۆ بۇگىن التىنشى كۇن ىزدەستىرىلۋدە، - دەپ حابارلايدى Qamshy.kz.

سافار شاكەيەۆ 16 شىلدە كۇنى تاڭعى 7-لەردە جوعالعان. سوڭعى رەت ونى سەيفۋللين كوشەسىمەن جوعارى ال-فارابيدەن ءوتىپ بارا جاتقاندا كورگەن. رەميزوۆكا اۋدانىنا قاراي بەت العان بولاتىن. 

بۇگىن تاڭعى ساعات 10.00-دەن بەرى ەرىكتىلەر سافاردى ىزدەستىرۋگە كىرىستى. "بۇگىن ءبىز ونى رەميزوۆكا جاقتان ىزدەيمىز. سەبەبى، ءبىز سافاردى وزەن بويىمەن جوعارى قاراي ۇيىنە بارا جاتتى دەپ ويلايمىز" دەگەن ەرىكتىلەر وسى اۋداننىڭ تۇرعىندارىن ۆيدەوتىركەگىشكە نەمەسە ۆيدەوباقىلاۋعا 17 شىلدەدە تاڭعى ساعات 7.30-دان تۇسكى 12.00-گە دەيىنگى ۋاقىتتا تۇسىرىلگەن ۆيدەولارىن جولداۋدى جانە وسى اۋماقتا سول ۋاقىتتا وتكەن اۆتوكولىك يەلەرىن ۆيدەوتىركەگىشتەرىندەگى جازبالاردى وشىرمەۋىن سۇرايدى.

ايتا كەتەيىك، ءىز-تۇزسىز جوعالعان سافار شاكەيەۆتى 50 پوليسەيدەن تۇراتىن ءموبيلدى توپ ىزدەۋدە. ىزدەستىرۋ ءوندىرىسى اياسىندا مەدەۋ اۋداندىق ءىىب بولىمشەسىنىڭ قىزمەتكەرلەرى جانە الماتى قالالىق ءىىد كريمينالدى پوليسيا باسقارماسىنىڭ وكىلدەرىنەن ارنايى تەرگەۋ-جەدەل توبى قۇرىلدى. سونداي-اق، ىزدەۋ شاراسىنا 15 ۋچاسكەلىك پوليسيا قىزمەتكەرلەرى دە جۇمىلدىرىلعان.