بىرنەشە كۇننىڭ الدىندا عانا اقش پرەزيدەنتتىگىنە رەسپۋبليكا پارتياسىنان ۇسىنىلعان كانديدات دونالد ترامپتىڭ ايەلى ءدۇيىم جۇرتتىڭ الدىندا پلاگيات جاسادى، - دەپ حابارلايدى Qamshy.kz ءتىلشىسى.  

8 جىل بۇرىن باراك وبامانىڭ ايەلى ميشەل وبامانىڭ جۇرت الدىندا سويلەگەن سوزدەرىن دونالد ترامپتىڭ ايەلى مەلانيانىڭ سوزبە-سوز قايتالاعانى جايىنداعى ۇياتتى جاڭالىق الەم اقپارات قۇرالدارىندا كەڭىنەن تاراپ كەتتى.

مەن دە بۇل اقپاراتتى العاش رەت كورگەن كەزدە يللينويس شتاتىنداعى جالدامالى پاتەرىمدە ءۇي تاپسىرمالارىمدى قاراپ وتىرعان ەدىم. جاڭالىقتى العاش كورگەندە ەرىكسىز مىرس ەتتىم: وسى وقيعادان ەكى كۇن بۇرىن عانا، وزدەرىنىڭ يدەولوگياسىن تىقپالاعاننان شارشامايتىن ءمۇعالىمىم پلاگيات جايىندا ارناۋلى ءبىر ساعات سويلەگەن ەدى. سوزدەرىنىڭ دالەلى رەتىندە گارۆارد ۋنيۆەرسيتەتىندە وقيتىن كااۆيا ۆيشۆاناتان (ۇندى-امەريكان)  دەگەن ستۋدەنتتىڭ  پلاگيات جاساعانى جايىندا ايتىپ ەدى. امەريكاندىق اپايىم اتالعان ستۋدەنتتىڭ پلاگيات جاسادى دەلىنگەن كىتاپتارىنىڭ بارلىعىنىڭ باسىلىمداردان شەكتەلگەندىگىن جانە ونىڭ گارۆارد ۋنيۆەرسيتەتىنەن وزدىگىنەن وقۋدان شەگىنگەندىگىن ايتا كەلىپ، امەريكادا پلاگيات جاساۋشىنىڭ «جازالاناتىنىن» ايتقان ەدى.

ول كەزدە مەن دە ءوز پىكىرىمدى ءبىلدىرىپ، پلاگياتتىڭ بۇكىل دۇنيەدە قابىلدانبايتىندىعىن ايتقان ەدىم. الايدا، امەريكاندىق اپايىم كەلىسپەگەن سىڭاي تانىتقان بولاتىن. سونشا تابانداپ، «امەريكادا عانا وسىلاي»،- دەگەن پىكىرىندە قالعان اپايىمنىڭ ساباعىنان ەكى كۇن وتپەي جاتىپ، «ەرتەڭ پرەزيدەنت بولادى-اۋ»،- دەگەن ادامنىڭ ايەلى ءدۇيىم ەلدىڭ الدىندا پلاگيات جاساپ ماسقارا بولدى. ەندى كەلەرگى ساباقتا اپايىمدى قالاي كورەر ەكەم؟-دەپ امەريكاندىق ءمۇعالىمىم ءۇشىن ۇيالىپ وتىرمىن.

تالعار دالەلعازى       

چيكاگو، اقش