27 شىلدەدە حالىقارالىق اۋىر اتلەتيكا فەدەراسياسى (IWF) 2008 جانە 2012 جىلدارى وتكەن وليمپيادالاردا الىنعان دوپينگ-سىنامالارى قايتا تەكسەرۋدىڭ ەكىنشى كەزەڭىنىڭ قورىتىندىلارى بويىنشا وڭ ناتيجە كورسەتكەن ءبىرقاتار سپورتشىلاردى جاريا ەتتى. سولاردىڭ قاتارىندا لوندون وليمپياداسىندا 94 كەلىگە دەيىن سالماقتا ونەر كورسەتكەن ءتورت زىلتەمىرشى بار، - دەپ حابارلايدى Qamshy.kz arhar.kz – كە سىلتەمە جاساپ.

ولار: قازاقستاندىق الماس وتەشوۆ (جەتىنشى ورىن)، ءازىربايجاندىق ينتيگام زايروۆ (التىنشى ورىن)، رەسەيلىك الەكساندر دەمانوۆ (ءتورتىنشى ورىن) پەن الەكساندر يۆانوۆ (ەكىنشى ورىن).

لوندون وليمپياداسىنىڭ چەمپيونى، قازاقستاندىق يليا ءيليننىڭ دوپينگ-سىناسى دا قايتا تەكسەرۋدەن سوڭ وڭ ناتيجە كورسەتتى. دەمەك، ۇزدىك شىققان جەتى سپورتشىنىڭ بەسەۋىندە دوپينگ-سىناما وڭ ناتيجە كورسەتكەندىكتەن، لوندون ويىندارىنىڭ التىن مەدالى ءۇشىنشى ورىندى يەلەنگەن مولدوۆالىق اناتوليي كىرىكۋعا بۇيىرادى.

«كۇمىس» سول كەزدە بەسىنشى بولعان يراندىق ساەد موحاممادپۋرعا، «قولا» سەگىزىنشى ورىنعا تابان تىرەگەن كورەيالىق كيم مين دجەگە بەرىلەدى. ايتا كەتەيىك، قازىرگى تاڭدا كىرىكۋ سپورتتان سەگىز جىلعا شەتتەتىلدى. ول 2015 جىلعى ەۋروپا چەمپيوناتىنىنىڭ قورىتىندىلارى بويىنشا دوپينگپەن ۇستالدى. ونىڭ قانىنان مەتەنولون تابىلدى. الايدا ول لوندون وليمپياداسىندا رەسمي تۇردە تازا بولدى.

اۋىر اتلەتيكادان قازاقستان قۇراماسى ريو وليمپياداسىنا سەگىز سپورتشىمەن اتتانادى. ولار: ارلي چونتەي (56 كەلىگە دەيىن)، فارحاد حاركي (62 كەلىگە دەيىن)، نيجات راحيموۆ (77 كەلىگە دەيىن)، دەنيس ۋلانوۆ (85 كەلىگە دەيىن) جانە الەكساندر زايچيكوۆ (105 كەلىگە دەيىن)، سونداي-اق مارگاريتا ەليسەيەۆا (48 كەلىگە دەيىن)، كارينا گوريچيەۆا (63 كەلىگە دەيىن) جانە جازيرا جاپپارقۇل (69 كەلىگە دەيىن). وسىدان بىرەر كۇن بۇرىن عانا ەلىمىزدىڭ بوكس قۇراماسى دا اتتانىپ كەتتى.