سولتۇستىك قازاقستان وبلىسىندا توتەنشە جاعدايلار قىزمەتكەرلەرى ورمانعا ساڭىراۋقۇلاق جيناۋعا كەتىپ، قايتىپ ورالماعان 61 جاستاعى پەتروپاۆل تۇرعىنىن 24 شىلدەدەن بەرى ىزدەپ جاتىر، دەپ حابارلايدى Qamshy.kz BNews.kz - كە سىلتەمە جاساپ.

تجد، سوكولوۆ ورمان شارۋاشىلىعى، قىزىلجار اۋدانىنىڭ جەرگىلىكتى پوليسيا قىزمەتكەرلەرىنەن، ەرىكتىلەردەن قۇرالعان توپ ىزدەۋ جۇمىستارىن كۇن سايىن جۇرگىزۋدە.

قۇتقارۋشىلار شىلدەنىڭ 24ء-ى مەن 28ء-ى ارالىعىندا ونداعان شاقىرىم اۋماقتى ءسۇزىپ ءوتىپ، رەسەيدىڭ تۇمەن وبلىسىنىڭ شەكاراسىنا دەيىن جەتتى.

«كۇن سايىن تاڭەرتەڭ جەكە قۇرامعا تەحنيكالىق قاۋىپسىزدىكتى ساقتاۋ تۋرالى نۇسقاۋلىق وتكىزىلىپ، ىزدەۋ جۇرگىزىلەتىن جەرلەر انىقتالادى. وترياد توپتارعا بولىنگەن، ءارقايسىنىڭ جەتەكشىسى بار. تۇراقتى تۇردە حابار الماسۋ ماقساتىندا توپتارعا راديوستانسيا بەرىلدى. ىزدەۋ جۇمىستارىنا 148 ادام، 9 تەحنيكا جۇمىلدىرىلىپ وتىر. سونداي-اق ەرىكتىلەر، جوعالعان ادامنىڭ تۋىستارى دا اتسالىسىپ جاتىر»، – دەدى سقو تجد كەزەكشىلىك-ديسپەچەرلىك قىزمەتىنىڭ باسشىسى رۇستەم جۇماعالييەۆ. 

قۇتقارۋشىلار مەن ەرىكتىلەر كۇن سايىن 27 شارشى شاقىرىم جەردى ءسۇزىپ شىعادى. وتريادپەن تۇراقتى تۇردە تەلەفون بايلانىسى جاسالادى.

ايتا كەتەيىك، پەتروپاۆل تۇرعىنى نيكولاي الەكساندروۆيچ ديتيۋك شىلدەنىڭ 23ء-ى كۇنى ساعات 14.00 شاماسىندا كورشىسىمەن بىرگە ساڭىراۋقۇلاق جيناۋعا كەتىپ، قايتىپ ورالماعان.