تۇركياداعى توڭكەرىس ارەكەتى جايلى استاناداعى تۇركيا ەلشىلىگىندە ساعات 14:00-گە جوسپارلانعان بريفينگكە ازاتتىق تىلشىلەرىن تىركەمەدى، - دەپ حابارلايدى Qamshy.kz. ازاتتىققا سىلتەمە جاساپ.

بۇل تۋرالى جۋرناليستەردى تىركەۋمەن اينالىسقان تۇرىك مادەني ورتالىعىنىڭ قىزمەتكەرى تەلەفوندا ايتتى. ورتالىقتىڭ ءوزىن قاسيەت دەپ تانىستىرعان قىزمەتكەرى ازاتتىق تىلشىسىنە "جۋرناليستەر سانىنىڭ شەكتەۋلى ەكەنىنە بايلانىستى تىزىمگە سىيماي تۇرعانىن" ايتتى.

ازاتتىق تىلشىلەرى جوسپارلى بريفينگكە كەشە ءوتىنىش بىلدىرگەن بولاتىن. تۇركيا ەلشىلىگىنىڭ ءاتى-جونىن تولىق اتاعىسى كەلمەگەن قىزمەتكەرى ازاتتىققا بريفينگە قاتىساتىن جۋرناليستەردى تۇركيانىڭ قازاقستانداعى ەلشىسى نيەۆزات ۋيانىكتىڭ ءوزى تاڭدايتىنىن ايتتى.

- ونى ەلشىنىڭ ءوزى ايتادى. قاي باق-تان كىم كەلەتىنىن ءوزى تاڭدايدى، - دەدى ءوزىن حاتشى ەرماحان دەپ قانا تانىستىرعان ەلشىلىك قىزمەتكەرى.

16 شىلدەگە قاراعان ءتۇنى تۇركيادا اسكەريلەردىڭ ءبىر بولىگى مەملەكەتتىك توڭكەرىس جاساماق بولىپ، بيلىك ونى باسىپ تاستاعان. بۇلىكككە قاتىسى بار، گۇلەنمەن بايلانىستى دەگەن كۇدىكپەن بىرنەشە مىڭ ادام ۇستالىپ، ونداعان مىڭ ادام جۇمىسىنان بوساتىلعان. رەسمي انكارا اقش-تان گۇلەندى ەكستراديسيالاۋدى سۇراعان. گۇلەن بۇلىكتى ايىپتاپ، وعان ءوزىنىڭ قاتىسى بارىن جوققا شىعارادى. تۇركيانىڭ ءبىرقاتار ەلدەردەگى ەلشىلەرى توڭكەرىس ارەكەتى مەن «گۇلەنشىلەردى» قۋدالاۋعا» شاقىرعان مالىمدەمەلەر جاساعان بولاتىن.