تاۋ-كەن سالاسىنداعى كاسىپورىندار اعىمداعى شىعىندارىن جابۋدا قيىندىق كورۋدە، - دەپ حابارلايدى Qamshy.kz kapital.kz دەرەكتەرىنە سىلتەمە جاساپ.

ۇستىمىزدەگى جىلى تاۋ-كەن ونەركاسىبى ينۆەستيسيالىق، وپەراسيالىق جانە قارجىلىق شىعىندارىن جابۋعا قاجەت قارجى تاپشىلىعىن سەزىنۋدە. 2016 جىلعى ءبىرىنشى توقسان قورىتىندىسى بويىنشا ءىرى جانە ورتا شيكىزات ءوندىرۋشى كاسىپورىنداردىڭ ءتۇسىمى شىعىستارىنان 25 ميللياردا كەم ەكەنىن ايتادى Finprom.kz ساراپشىلارى.

قارجىنىڭ كەرى سالدوسى بىلتىرعى قاڭتار-ناۋرىز ارالىعىنداعى كورسەتكىشتەرمەن سالىستىرعاندا تومەن بولىپ وتىر. مۇنداي كورسەتكىش 2009 جىلعى داعدارىس كەزىندە بايقالعان بولاتىن.

ءبىر سوزبەن ايتقاندا، ءىرى جانە ورتا شيكىزات وندىرۋشىلەردىڭ جالپى تابىسى تومەندەۋدە. 2016 جىلدىڭ قاڭتار-ناۋرىز ايلارىندا وسى سالاداعى تازا تابىس 507 ميلليارد تەڭگەنى قۇراعان. بۇل 2015 جىلدىڭ ءبىرىنشى توقسانىنداعى كورسەتكىشتەن 15 پايىزعا جوعارى بولعانىمەن، 2011-2014 جىلداردىڭ اتالعان كەزەڭىندەگى دەڭگەيدەن الدەقايدا تومەن.

تاۋ-كەن ونەركاسىبى كاسىپورىندارىنىڭ باستى تۇسىمدەرى (87 پايىز) نەگىزگى قىزمەت ەسەبىنەن قۇرالادى. 2015 جىلدىڭ قاڭتار-ناۋرىز ايلارىمەن سالىستىرعاندا ساتۋدان تۇسكەن اقشا 13 پايىزعا ارتقانىمەن، ونىڭ جالپى كولەمى 2011-2014 جىلدارداعى كورسەتكىشتەردەن تومەن بولىپ وتىر. ورتاشا العاندا وپەراسيالىق قىزمەت كىرىستەرى شيكىزات باعاسىنىڭ جوعارى كەزىندەگى دەڭگەيدەن 20 پايىزعا قالىپ كەلەدى.

اعىمداعى جىلى تاۋ-كەن كاسىپورىندارى بىلتىرعىدان گورى نەسيەنى از الىپ وتىرعانى بايقالادى. قارجىلىق قىزمەتتەن تۇسكەن ءتۇسىم سوماسى 2015 جىلدىڭ ءبىرىنشى توقسانىنان 37 پايىزعا تومەن.

ينۆەستيسيالىق تۇسىمدەر دە 31 پايىزعا كەمىپ، 61،7 ميلليارد تەڭگەنى قۇراعان.

الايدا، شىعىنداردىڭ ەكونوميكانىڭ تۇراقتى (2011-2014 جىلدارداعى) كەزەڭىندەگى دەڭگەيدەن كەمىمەگەنى بايقالادى.