بۇدان بىلاي بانك بورىشكەرلەرى كەپىلگە قويىلعان ۇيلەرىنەن قۋىلمايدى. بانك وزىنە قارىز ادامدارمەن مامىلەگە كەلە باستادى، - دەپ حابارلايدى Qamshy.kz 365info.kz - كە سىلتەمە جاساپ.

بۇل تۋرالى ق ر ۇلتتىق بانكتىڭ باسپا ءسوز قىزمەتى حابارلادى.

وسىعان دەيىن ۇيلەرىن كەپىلگە قويعان ازاماتتاردى جالعىز باسپاناسى بولسا دا ۇيىنەن كۇشتەپ شىعارىلىپ كەلگەن. وسىنى توقتاتۋ ءۇشىن ۇلتتىق بانك، ەكىنشى دەڭگەيلى بانكتەر مەن الماتى اكىمدىگى، قوعامدىق بىرلەستىكتەر بولىپ ءتورت جاقتى مامىلەگە قول قويىلدى.

مامىلەگە سايكەس، ەندى 3 اي مەرزىم ىشىندە نەسيەسىن قايتارا الماي جۇرگەندەر بانككە كەلىپ، باسىنداعى جاعدايىمەن ءبولىسۋى ءتيىس. الايدا، بۇل بورىشكەر نەسيەسىن تولەمەيدى دەگەن ءسوز ەمەس. تەك شاماسىنا قاراي تولەۋ شارتتارى جۇمسارتىلادى.

قازىرگى تاڭدا ەلىمىزدە انە-مىنە ۇيىنەن قۋىلۋعا شاق وتىرعان 40 مىڭعا جۋىق وتباسى بار. ال ءتورت جاقتى قول قويىلعان قۇجات وسى تۇيتكىلدى شەشۋگە سەپتىگىن تيگىزەدى.

— بورىشكەر ءوز ەركىمەن بانككە كەلىپ، قارجىلىق قيىندىقتارى بارىن اشىق ايتۋى ءتيىس. وسىلاي بولا تۇرا، قارىزىن وتەۋدەن باس تارتپايتىندىعىن بىلدىرسە، بانك وكىلدەرى وعان تۇسىنىستىكپەن قاراپ، ءار بورىشكەرگە قارىزدى وتەۋدىڭ جولدارىن بىرلەسىپ قاراستىراتىن بولادى — دەپ ءتۇسىندىردى ۇلتتىق بانكتىڭ باسقارما باسشىسى الەكساندر تەرەنتيەۆ.