قازاقتىڭ ءبىرتۋار ۇلى، حالىق قاھارمانى، كەڭەس وداعىنىڭ باتىرى توقتار اۋباكىروۆ 70 جاسقا تولدى. ەڭبەك جولىن جۇك تاسۋشى بوپ باستاپ، باتىر اتانعانشا كورگەن-بىلگەنى كىتاپقا جۇك بولعان ەرىن بۇگىن ەلى ۇلىقتاپ جاتىر. الەمدەگى تەڭدەسى جوق 10 ۇشقىشتىڭ قاتارىنا كىرەتىن، عاسىر ادامى اتانعان باتىر كىندىگى كەسىلگەن قارقارالىعا كەلدى، - دەپ حابارلايدى Qamshy.kz كتك ارناسىنا سىلتەمە جاساپ.

حالىق باتىرى ۇشۋداعى ەڭ قيىن ءسات ۇشقىش بولۋى ءۇشىن تاپسىرعان ەمتيحان كەزىندەگى جاعداي دەيدى. قالعانى تەك كۇندەلىكتى جۇمىس. كاسىبىنىڭ جىلىگىن شاعىپ مايىن ىشكەنى سونشا، كەڭەس ۇكىمەتىندەگى جويعىشى بار، باسقاسى بار 50 ۇشاقتى سنىاقتان وتكىزىپ بەردى. وداقتا العاشقى بولىپ 1989 جىلى ميگ-29-بەن كەمەگە قونىپ، قايتا ۇشىپ كەتكەن. قازاقتىڭ قارا نارداي جىگىتى جويعىش ۇشاقپەن ەش ايالداماسىز سولتۇستىك پوليۋسكە بارىپ كەلگەن العاشقى ۇشقىش رەتىندە دە تاريحتا قالدى. كەڭەس وداعىنىڭ باتىرى اتاعىن دا وسى ءۇشىن العان. الەمنىڭ تەڭدەسسىز ۇشقىشى رەتىندە ەسىمى ۆاشينگتوندا جازىلدى.

توقتار اۋباكىروۆ، عارىشكەر، حالىق قاھارمانى:

-مەنى سوناۋ قيىر شىعىستا ەڭ ۇزدىك ۇشقىش دەپ تانىدى. ول دا ءجاي سەبەپتەن ەمەس. نەگە دەسەڭىزدەر مەن قازاقتىڭ اتىنان ءجۇردىم. جالعىز قازاق بولعاسىن ۇلتىمدى جاقسى قىرىنان كورسەتكىم كەلدى.

دەسە دە، بالا توقتاردىڭ كۇنى مامىراجاي بولعان جوق. اكەدەن ەرتە قالىپ، ەڭكەيگەن اناسىن جەتەكتەپ تەمىرتاۋعا كەلگەندە، جاسى تولماعاندىقتان جۇمىسقا تۇرا الماي قينالدى. ويتكەنى 15-تەگى كۇالىگى جوق اۋىل بالاسىن ەشكىم ماڭايلاتپاعان. جۇمىسقا جۇلقىنىپ، ەكى كوزى جانىپ تۇرعان بوزبالا اقىرى كۋالىك بەرەتىن جەردەن قۇر قايتپادى.

توقتار اۋباكىروۆ، عارىشكەر، حالىق قاھارمانى:

-مەن وتىرىپ الدىم. كيەتىن كيىمىم جەيتىن تاماعىم جوق سەندەر مەنى تاماقتاندىراسىڭدار دەپ.  سودان كەيىن مەن وسى جەرگە شەشەيدى الىپ كەلە دەدىم. مەن ءبىرىنشى بالانى كورىپ تۇرمىن جاس كۇننەن جۇمىسقا بارعىسى كەپ جۇرگەن. ەي، جازىپ بەرىڭدەر دەدى. 

سودان تەمىرتاۋ مەتەلل قۇيۋ سەحىندە ەڭبەك ەتە ءجۇرىپ العاشىندا پاراشيۋتتەن سەكىرۋ، كەيىن ۇشقىشتار مەكتەبىنە وقۋعا الىندى. العىر، ىزدەنىمپاز، ەڭبەكسۇيگىن جىگىت اقىرى جويعىش ۇشاقتاردى تاقىمدايتىن ۇزدىك اتاندى. 1991 جىلى عارىشكەرلەردى دايىنداۋ توبىنا قابىلدانىپ سول جىلى كۇزدە قازاق پەن عارىشتى بايلانىستىرعانىن ەل بىلەدى. ءبىر وكىنىشتىسى كەڭەس ۇكىمەتى باسشىلىعى عارىشقا ۇشقاننىڭ بارىنە ۇستاتاتىن باتىر اتاعىن وعان قيماعان. تۋعان ەلى 70 كە كەلگەندەگى تويىن جاساپ، قارسى العان قارقارالىدا باتىر الدىمەن اتا-بابا ەسكەرتكىشىنە قۇران باعىشتادى. سالدەن سوڭ ەلىنىڭ قوشەمەتىنە بولەنىپ، قاۋمالاعان قاراشانىڭ اراسىندا كورىنبەي كەتتى.

الاش جۇرتىنىڭ اماناتىن ارقالاپ، عارىشقا بارىپ كەلگەن باتىردىڭ تويىن تۋعان ولكەسى وسىلاي تويلاۋدا. 100 گە تارتا كيىز ءۇي تىگىلىپ ات جارىسى مەن بالۋان كۇرەستىرگەن ەل مارە-سارە. ويتكەنى تاۋەلسىزدىك پەن قازاق بالاسىنىڭ جەتى قات كوكتەن اسقانىنا 25 جىل تولعانى ەل ءۇشىن ايتۋلى مەرەكە بوپ تۇر.