بىردە جەزقازعانعا بارعانىمدا ونداعى دوستارىمنىڭ ءبىرى قالا تۇرعىندارى «ساقالتايلار» دەپ ات قويىپ، ايدار تاققان سالافيت جاستاردىڭ سپورتقا، جاۋىنگەرلىك دايىندىققا اسا ءمان بەرەتىنى تۋرالى وربىگەن اڭگىمە اراسىندا ولاردىڭ قالاداعى پەينتبول ورتالىعىنىڭ تۇراقتى كليەنتتەرى ەكەنىن ايتىپ قالدى.

«اپتاسىنا بىرنەشە رەت پەينتبول الاڭدارىن جالعا الادى. توپتارىنا بوتەن ادامدى كىرگىزبەيدى. تەك وزدەرى جينالىپ بارىپ، الاڭدى بىرنەشە ساعاتقا يەلەنەدى. وزگەلەرمەن بىرلەسىپ «سوعىسۋعا» قۇلىقسىزدىق تانىتادى، بوتەن ادامداردىڭ الاڭعا كىرگەنىن قالامايدى»، - دەپ قالعانى بار. سول ءسوز سول ايتىلعان جەرىندە قالىپ، سول ساتتە اسا ءمان بەرمەگەنىم وتىرىك ەمەس. ءتىپتى، «زەينەتاقى قورىنا اقشا اۋدارۋ – حارام، ەڭبەك كودەكسى – شاريعاتقا قايشى» دەپ، ەڭبەك زاڭنامالارىنا ساي تۇراقتى مەكەمەلەردە جۇمىس ىستەۋدەن قاشقاقتايتىن كەي «ءدىنداردىڭ» جارىلعىش زاتتار پايدالانىلاتىن شاحتالار مەن قارۋ-جاراقپەن تىكەلەي بايلانىستى كۇزەت قىزمەتتەرىنەن باس تارتپايتىنى، الگىندەي «شاريعي تىيىمداردى» ۇمىتىپ كەتەتىنى دە ويلاندىرماپتى سول كەزدە...

18 شىلدەدە الماتىدا بولعان وقيعا راديكالدى جاستاردىڭ الەۋمەتتىك پورترەتى تۋرالى قايتا ويلانۋعا سەبەپ بولعانى انىق. ولاردىڭ نە ءۇشىن راديكالداناتىنى، مەملەكەتتىك جۇيە مەن زاڭدارعا قارسى تۇراتىنى، زايىرلىلىق پرينسيپتەرى مەن زايىرلى ءومىر سالتىن ۇستاناتىن جاندارعا قاسكويلىگى ەمەس ويلاندىرعان. ويلاندىرعانى، جالعىز ادامنىڭ ساناۋلى مينۋتتار ىشىندە قانشاما ادامدى ءولتىرىپ، جاراقاتتاعانى. قارۋلى قاقتىعىستاردى بىلاي قويىپ، اسكەردە مەرزىمدىك قىزمەتىن وتەمەگەن ادامنىڭ الگىندەي شەبەرلىك كورسەتۋى شىنىمەن ويلاندىرادى. كوپ ادامنىڭ كوكەيىندە ءالى كۇنگە وسى سۇراق جۇرگەنى انىق.

ءقازىر الماتىدا قاندى قىرعىن ۇيىمداستىرعان رۋسلان كۇلىكبايەۆ تەرگەلىپ جاتىر. ءبىرقاتار اقپارات قۇرالدارى ايىپتالۋشىنىڭ تەرگەۋدە ايتقان سوزدەرىن جاريالاۋدا. ر. كۇلىكبايەۆتىڭ تەرگەۋشىلەرگە ايتقان كەي ءسوزىن جاقىندا «ۆرەميا» گازەتى دە جاريالادى. الماتى قالاسى المالى اۋداندىق ىىب-گە ول ءبىر تاپانشا، ءبىر شولاق مىلتىقپەن بارعانىن ايتىپتى.

«بالا كەزىمدە مەن كيكبوكسينگپەن اينالىستىم، ورىن الماسام دا وبلىستىق جارىستارعا قاتىسىپ ءجۇردىم. اسكەردە بولمادىم، ءبىراق، اڭشىلىقپەن اۋەستەندىم. ودان بولەك پەينتبولمەن كاسىبي تۇردە شۇعىلداندىم. مەن شىنىمەن سۋديالاردان، پوليسيا مەن پروكۋرورلاردان ءوش العىم كەلدى. ءوزىمنىڭ ۇكىمىم وبەكتيۆتى بولدى دەپ سانامايمىن. ءبىرىنشى المالى اۋداندىق سوتىنا باردىم، ءبىراق ول جاقتا فورما كيگەن ەشكىمدى كەزدەستىرمەدىم. ودان المالى اىىب-گە باردىم دا پوستتان جاڭا عانا شىققان ادامدى اتتىم...سوسىن باسقا پوليسەيلەرگە وق جاۋدىردىم. بەيبىت ادامداردى اتپادىم. جەزوكشەگە كەلەر بولساق، مەن وعان جانە باسقالارىنا دا كاسىپتەرىنىڭ، اسىرەسە، رامازان ايىندا حارام ەكەنىن ەسكەرتتىم. مەن ولارعا جەزوكشەلىكتى اللا قالامايتىنىن ەسكەرتسەم دە ولار تىڭدامادى. سوسىن مەن ونى اتتىم. ...ماكاروۆ تاپانشاسى مەن شولاق مىلتىقتى كوشەدەن تاۋىپ العام، قاي كوشە ەكەنى ەسىمدە جوق...»، - دەيدى ر. كۇلىكبايەۆ تەرگەۋ بارىسىندا.

ر. كۇلىكبايەۆتى قانشا جەردەن دىنگە قاتىسى جوق، ونىڭ ارەكەتىن ادەتتەگى بانديتيزم دەۋگە تىرىسقانمەن ونىڭ وسى سوزدەرى العاشقى ادامدى (جەزوكشەنى) ءدىني كوزقاراسىنا بايلانىستى ولتىرگەنىن راستايدى. ەڭ باستىسى ول اتۋ دايىندىعىن «پەينتبولمەن كاسىبي تۇردە شۇعىلدانۋ» ارقىلى شىڭداعانىن مويىنداپ وتىر. شىنىمەن دە نىسانانى ءدال كوزدەپ، وزىنە وق تيگىزبەي ۇرىس جاساۋ ءۇشىن قالادا باسقا قانداي جەردە دايىندالۋعا بولادى؟ ايىپتالۋشىنىڭ ايتقانىنا سەنبەسكە شارا جوق.

سونىمەن، 18 شىلدە كۇنى الماتى قالاسىندا 5 ادامدى ءولتىرىپ، 7 ادامدى جارالاعان (جارالانعان ءبىر پوليسەي كەلەسى كۇنى كوز جۇمدى – رەد.) ر. كۇلىكبايەۆ پەينتبول ورتالىعىنا ءجيى بارىپ تۇرعان. پەينتبول – بىرنەشە ادام قاتىساتىن توپتىق ويىن. دەمەك، ر. كۇلىكبايەۆ جالعىز ەمەس...

دارحان مۇقانتەگى