29 شىلدە حالىقارالىق جولبارىستار كۇنىندە بۇۇ-نىڭ قورشاعان ورتا جونىندەگى باعدارلاماسى (يۋنەپ) اتالمىش سۇتقورەكتىلەردى قورعاۋ جانە جابايى اڭداردى زاڭسىز ساۋدالاۋمەن كۇرەسۋ جونىندە كەڭ اۋقىمدى كامپانيانى باستادى، - دەپ حابارلايدى Qamshy.kz.

بۇگىنگى تاڭدا دۇنيەجۇزىندە نە ءبارى 3000 جولبارىس قالعان. سوڭعى 100 جىلدا جولبارىس تۇرلەرىنىڭ 97 پايىزى جويىلعان. بۇل حايۋاندار تۇقىمىنىڭ جەدەل قۇرىپ بارا جاتۋىنا زاڭسىز ساۋدا باستى سەبەپ بولىپ وتىر. جولبارىستىڭ دەنە مۇشەلەرىنەن جاسالعان دارى-دارمەك پەن  ءتۇرلى اشەكەي  زاتتار قارا بازاردا قىمبات باعاعا ساتىلادى.

«ءار ادام، مەيلى پوليسەي بولسىن، كەدەنشى، دەپۋتات، قاۋىم جەتەكشىسى، پروكۋرور، سۋديا نەمەسە قاراپايىم ازامات بولسىن، جابايى اڭدار ساۋداسىنىڭ الدىن الۋدا  اتقاراتىن ءرولى بار. 2030 جىلعا دەيىنگى تۇراقتى دامۋ ماقساتتارىن جۇزەگە اسىرۋدا اڭداردىڭ زاڭسىز ساۋداسىنا  قارسى ناقتى شارالار قابىلداۋ قاجەت» دەدى، يۋنەپ-تىڭ ايماقتىق باسشىسى يزابەل لۋيس.

جابايى اڭداردىڭ زاڭسىز ساۋداسى الەم بويىنشا ءنومىرى ءبىرىنشى ءقاۋىپ بولىپ وتىر. بيىل ماۋسىم ايىندا تايلاند پوليسياسى  بۋددا ءموناستىرىنىڭ مۇزداتقىش كامەراسىنان 70 جاڭا تۋىلعان جولبارىستىڭ سۇيەگىن تاپقان. سونداي-اق باسقا دا جابايى حايۋانداردىڭ تەرىسى مەن دەنە مۇشەلەرىنەن جاسالعان تاليسمانداردىڭ جاسىرىلعانى انىقتالعان.

بۇۇ-نا قاراستى اتالمىش باعدارلاما ماماندارى جابايى تابيعاتقا جاسالعان قاستاندىقتار ۇلتتىق دامۋدى ۇزەدى جانە ميللياردتاعان دوللار قاراجاتتىڭ حالىقارالىق قىلمىستىق توپتاردىڭ «قالتاسىنا» تۇسۋىنە كومەكتەسەدى دەپ دابىل قاعۋدا. سوندىقتان بۇۇ بۇكىل الەم جۇرتشىلىعىن حايۋاناتتاردى قورعاۋعا ۇندەي وتىرىپ، جابايى تابيعاتقا قاستاندىق جاساۋعا قارسى بىرىگىپ كۇرەسۋگە شاقىرادى.

شارافات جىلقىبايەۆا