بۇل سۇراققا الماتىدا جۋرناليستەرمەن كەزدەسكەن ەلدىڭ قورعانىس ءمينيسترى يمانعالي تاسماعامبەتوۆتىڭ ءوزى جاۋاپ بەردى، - دەپ حابارلايدى Qamshy.kz 365info.kz-كە سىلتەمە جاساپ.

ەستەرىڭىزگە سالساق، شىمكەنتتىك «سىرا كورولى» توقتار تولەشوۆ قاڭتار ايىندا قاماۋعا الىنعان بولاتىن. وعان قىلمىستىق كودەكستىڭ ءبىرقاتار باپتارىمەن قوسا، «بيلىكتى كۇشپەن باسىپ الماق بولدى» دەگەن دە ايىپ تاعىلدى. ت. تولەشوۆتىڭ سىبايلاستارى رەتىندە 6 ماۋسىم كۇنى وڭتۇستىك قازاقستان وبلىسىندا ورىن تەپكەن 35748، 55652 اسكەري بولىمدەرىنىڭ كومانديرلەرى بەكزات جۋمين مەن قايرات پەرنەبايەۆ دەگەن پولكوۆنيكتەر دە تۇتقىندالعان ەدى.

وسى ەكى شەندىگە قاتىستى ساۋال الماتىعا كەلگەن تاسماعامبەتوۆكە توتەسىنەن قويىلدى.

جاۋابىن «تەرگەۋدىڭ اياقتالۋىن كۇتەيىك» دەپ باستاعانىمەن ي. تاسماعامبەتوۆ وڭباي شاتىلعان ەكى باعىنىشتىسىنا قاتىستى ءوز ويىن جاسىرمادى ءتىپتى، ولاردى «اقشاعا ساتىلىپ، ءوز بەتتەرىنشە ارەكەت ەتكەن» دەپ ايىپتادى.

پولكوۆنيك قايرات پەرنەبايەۆ وتباسىمەن. سۋرەت: otyrar.kz

پولكوۆنيك بەكزات جۋمين. سۋرەت: otyrar.kz

«حالىق «سىرا كورولى» اتاپ كەتكەن كىسى ۇستالا سالىسىمەن، ماعان ت. تولەشوۆتىڭ بۇرىن مقم-دە قىزمەت اتقارعان اكەسىنىڭ قۇرمەتىنە  ۇيىمداستىرعان «دەسانتتار سلەتى» اتالاتىن شارانىڭ ۆيدەوسىن الىپ كەلدى. وعان رەسەيلىك تە اسكەريلەر شاقىرىلىپتى. «سلەتتا» كوپ اسكەري تەحنيكا كورسەتىلگەن، ۇشاقتار دا قاتىسقان...

ارينە، مەن بىردەن قىزمەتتىك تەكسەرىس تاعايىندادىم. تەكسەرىس ولاردىڭ (ب. جۋمين، ق. پەرنەبايەۆ – رەد.) جوعارعى قولباسشىلىقتىڭ كەلىسىمىن الماي، ءوز بەتتەرىمەن ارەكەت ەتكەنىن انىقتادى. سودان كەيىن مەن ولاردى كوماندير مىندەتىن اتقارۋدان بوساتتىم. كەيىن ولاردىڭ ءىسى ۇلتتىق قاۋىپسىزدىك كوميتەتىنە تاپسىرىلدى.

مەنىڭ ويىمشا، بۇل جەردە پاراقورلىق سيپاتى انىق كورىنەدى، ولارعا اقشا بەرگەن..»، - دەپ جاۋاپ بەرگەن ي. تاسماعامبەتوۆ.

ت. تولەشوۆ وتكىزگەن "سلەتتىڭ" ۆيدەوسى