قاراعاندىنىڭ قارقارالى اۋدانىنداعى قاسىم امانجولوۆ اۋىلىنىڭ اكىمدەرى شىرت ۇيقىدا جاتقاندا،  جەرگىلىكتى حالىق جولداردى ءوز كۇشتەرىمەن قالىپقا كەلتىرىپ جاتىر. ۇلكەن-كىشى دەمەي قولدارىنا كۇرەك العان حالىق جەردى تاڭعى ساعات توعىزدان باستاپ كۇن باتقانعا دەيىن  تەگىستەيدى ەكەن، - دەپ حابارلايدى Qamshy.kz 31 ارناعا سىلتەمە جاساپ.

«ويتپەسكە امالىمىز قالمادى»، دەيدى كوپشىلىك. ويتكەنى، جول ماشاقاتىن باسشىلارعا سان مارتە ايتقانىمەن، ساۋساق ۇشىن قيمىلداتقان جان بايقالماپتى. ءتىپتى، جەرگىلىكتى اكىم كومەك تۇگىلى تەحنيكا دا بەرمەي قويعان. 

- مەنىڭ ەستۋىمشە جولعا ءۇش جىلدا ءبىر رەت 90 ميلليون تەڭگە بولىنەدى ەكەن. ال سول قاراجات نەگە تەكسەرىلمەيدى. اقىرىندا پەنسياعا اۋىزدارىن اشىپ، جول جوندەيمىز دەپ اقشا جينادى. اۋىل جىگىتتەرى بولسا، ات سالىسىپ، جەڭىل-جەلپى جوندەۋ وتكىزىپ جاتىر. ال وسىعان  ءبىر شارا بولا ما، جوق پا؟، - دەيدى قارقارالى اۋدانىنىڭ تۇرعىنى مايراش وسەروۆا. 

سوندىقتان وسىدان ءۇش جىل بۇرىن عانا جوندەلگەن 45 شاقىرىم جولدى قالىپقا كەلتىرۋگە حالىق اقشانى دا ءوز قالتالارىنان شىعارىپتى. قاسىم امانجولوۆ اۋىلىنداعى 2000 تۇرعىننان شامامەن 200 مىڭ تەڭگەدەي قاراجات جينالىپتى. ءبىراق تاس جولدى اسفالتتاۋعا سوندا دا اقشا جەتپەيدى دەپ وتىر. اقىرى حالىق قۇم توسەپ، جولدىڭ شۇرىق-تەسىكتەرىن جاماپ جاتىر. ال جەرگىلىكتى ماماندار 45 شاقىرىم جولدى جوندەۋ ءۇشىن شامامەن 300 ميلليون تەڭگە جۇمسالادى دەپ وتىر. وسىدان ءۇش جىل بۇرىن جوندەلگەن جولدى قالىپقا بيىل كەلتىرمەيمىز دەيدى. سەبەبى بيۋدجەتتە اقشا تاپشى.

- «جول قارتاسى-2020» باعدارلاماسى اياسىندا قارقارالى قاسىم امانجولوۆ 45 شاقىرىمدى قۇرايتىن تاس جولىنا ورتاشا جوندەۋ جۇمىستارىن جۇرگىزۋگە 302 ميلليون تەڭگە بيۋدجەتتىك ءوتىنىم جولدانعان بولاتىن. بۇگىنگى كۇنى قارجى بولىنبەدى، - دەيدى قارقارالى اۋدانى اكىمشىلىگىنىڭ تكش جولاۋشىلار كولىگى ءاۆتوموبيلدى جولدار، قۇرىلىس جانە تۇرعىن ءۇي ينسپەكسياسى ءبولىمى سەكتورىنىڭ مەڭگەرۋشىسى قۇمار باتىربەكوۆ.