سوڭعى ءبىر ايدا 60 مىڭنان استام وڭتۇستىك سۋدان تۇرعىنى ەلىن تاستاپ قاشقان. بۇگىندە قارۋلى قاقتىعىستار سالدارىنان بۇل ەلدە ازى-تۇلىك تاپشىلىعى ورىن الۋدا. بۇل تۋرالى بۇۇ-نىڭ جاڭالىقتار ورتالىعى حابارلايدى. دارىگەرلەر ااتالمىش ەلدە تىرىسقاق اۋرۋى تاراپ جاتقانىن ايتىپ دابىل قاعۋدا. بۇۇ وسى ماسەلەگە بايلانىستى سوعىسۋشى تاراپتارعا كومەككە ءزارۋ ادامداردىڭ بار ەكەنىن ەسكە سالدى. «دجۋبادا كۇش كورسەتۋلەر سالدارىنان وتكەن ايدا ەلدەن 60 مىڭ ادام قاشىپ شىققان. ءسويتىپ 2013 جىلى شامامەن 900 مىڭ وڭتۇستىك سۋدان تۇرعىنى بوسقىنعا اينالدى» دەدى، بۇۇ-نىڭ بوسقىندار ءىسى جونىندەگى جوعارعى كوميسسار باسقارماسىنىڭ باسپا ءسوز حاتشىسى مەليسسا فلەمينگ جەنيەۆادا وتكەن بريفينگتە.

ۋگانداعا اۋعان وڭتۇستىك سۋداندىق بوسقىندار سانى سوڭعى ون كۇندە ەكى ەسەگە وسكەن  (ءۇش اپتادا 52 مىڭنان استام ادام بارعان). وسى ۋاقىت ارالىعىندا كەنياعا شامامەن 1000 وڭتۇستىك سۋدان ازاماتى اۋىپتى. بوسقىنداردىڭ ايتۋىنشا، قارۋلى توپتار ەلدىڭ بۇكىل تەرريتورياسىندا ويلارىنا كەلگەنىن ىستەۋدە. ولار اۋىلدارعا شابۋىل جاساپ، ازاماتتاردى ءولتىرىپ، جاس جىگىتتەردى قارۋلى توپقا قوسىلۋعا كۇشتەپ ماجبۇرلەۋدە.

قازىرگى تاڭدا وڭتۇستىك سۋداندا تىرىسقاقتىڭ 586 وقيعاسى تىركەلگەن. جيىرما ادام وسى اۋرۋدان كوز جۇمعان. اۋرۋمەن كۇرەسۋگە ەلدەگى مەديسينالىق مەكەمەلەر دارمەنسىز بولىپ وتىر. حالىقتىڭ تەڭ جارتىسىنا كوبى حالىقارالىق گۋمانيتارلىق كومەكتىڭ ارقاسىندا كۇن كورىپ وتىر. بۇۇ-نىڭ گۋمانيتارلىق ماسەلەلەر جونىندەگى باسقارماسىنىڭ باسپا ءسوز حاتشىسى     يەنس لاەركەنىڭ سوزىنە سەنسەك، وڭتۇستىك سۋداننىڭ 4،8 ميلليون تۇرعىنى تويىپ تاماق ىشپەيدى ەكەن. ازىرشە حالىقارالىق  كومەكتىڭ تولاسسىز كەلۋىنە قاراماستان بۇل  ەلدەگى جاعداي جاقسارار ەمەس.   

دانا قامشىبەك