الماتىدا جوعالعان 18 جاستاعى جۇلدىز ەرمانوۆانى بەلگىسىز بىرەۋلەر الىپ قاشىپ كەتكەن بولىپ شىقتى، - دەپ حابارلايدى Qamshy.kz Tengrinews.kz - كە سىلتەمە جاساپ. 

جۇلدىزدىڭ تۋعان اپكەسىنىڭ ايتۋىنشا، الەۋمەتتىك جەلىلەردە جۇرت شۋلاعاننان كەيىن ۇرلاپ اكەتكەندەر قىزدى ۇيىنە قايتارعان. دوستارىنىڭ ايتۋىنشا، ەرمانوۆا ءوزىن الىپ قاشىپ كەتكەن جىگىتتى تانىماعان دا. تۋىستارىنىڭ ايتۋىنشا، ولار جىگىتتىڭ ۇستىنەن ارىز جازبايدى. پوليسەيلەر تەرگەۋ جۇرگىزىپ جاتىر. وقيعانىڭ ءمان-جايى پروسەسستىك ارەكەتتەردىڭ بارىسىندا انىقتالادى. 

"جۇلدىزىمىزدى ىزدەستىرۋگە قولداۋ كورسەتىپ، كومەك قولىن سوزعاندارعا العىس ايتامىز. قوعام بىزگە كومەكتەستى. سىزدەردىڭ كومەكتەرىڭىزسىز ءبىز ەشتەڭە ىستەي المايتىن ەدىك! سەبەبى جۇلدىزدى بەيتانىس جىگىت الىپ قاشىپ كەتكەن، ءسويتىپ، ءوزىنىڭ قالىڭدىعى ەتكىسى كەلىپتى. جۇلدىز نەكەگە كەلىسىم بەرمەپتى. جىگىتتىڭ اتا-اناسى جۇرتتىڭ شۋلاعانىن ءبىلىپ، پوليسەيلەردىڭ ىزدەستىرىپ جاتقانىن كورگەننەن كەيىن شوشىپ كەتىپ، ءسىڭلىمدى قايتاردى"، - دەدى جۇلدىزدىڭ اپكەسى اقشولپان ەرمانوۆا.

ونىڭ ايتۋىنشا، جۇلدىز قورقىپ قالعان، ءبىراق جاعدايى جاقسى. "ءبارى بەيبىت جولمەن شەشىلدى"، - دەدى اقشولپان.

ەسكە سالايىق، 18 جاستاعى جۇلدىز ەرمانوۆا الماتىدا 1 تامىزدا جوعالىپ كەتكەن ەدى. قىزدى ىزدەستىرۋ تۋرالى حابارلاندىرۋ الەۋمەتتىك جەلىلەر مەن باق-تاردا جاريا بولدى، ونى قۇقىق قورعاۋ ورگاندارى مەن ەرىكتىلەر ىزدەستىردى. ال بۇگىن، 3 تامىزدا ول تابىلدى.