بۇل تۋرالى الماتىدا وتكەن ادام قۇقىعى جونىندەگى حالىقارالىق بيۋرونىڭ باسپا ءسوز ءماسليحاتىندا ايتىلدى، - دەپ حابارلايدى Qamshy.kz.

لا-155/18 مەكەمەسىندە ناتاليا سلەكيشينانى زورلاۋ وقيعاسىنا قاتىستى شۋدان سوڭ قۇقىققورعاۋشىلارعا وسىنداي تاعى باسقا زاڭ بۇزۋشىلىقتار بەلگىلى بولعان كورىنەدى. ءدال سول مەكەمەدە تاعى ەكى ايەلدىڭ جۇكتى بولعاندىعى انىقتالعان.

«ۇلاعاتتى وتباسى» قورىنىڭ پرەزيدەنتى مارياننا گۋرينا سوتتالعان ايەلدەردەن كوپ جاعدايعا قانىققانىن ايتادى. ونىڭ ايتۋىنشا، يزولياتور جىن ويناققا اينالعان. ەركەكتەر اقشاسىن تولەسە ۇناتقان ايەلدەرىنە كىرىپ، كەزدەسە الاتىن كورىنەدى.

«مەكەمە جەزوكشەلەر ۇيىنە اينالىپ كەتكەن. بەلگىلى-بىر جەڭىلدىكتەرگە يە ادامدار جىنىستىق قاتىناستى قاجەت ەتسە، ولارعا سونداي كەزدەسۋلەر جاساپ بەرەدى»، - دەيدى ول.

ادۆوكات ايمان وماروۆانىڭ ايتۋىنشا، ن. سلەكيشينا تۇرمەدە ينتيمدىك بايلانىسقا ءتۇسۋدى قالاماعان، سوندىقتان ونى زورلاعان. قازىرگى ۋاقىتتا ونىڭ ءىسى سوتقا جىبەرىلگەن. ادۆوكات ىسكە قاتىسى بار دەلىنگەن مەكەمەنىڭ بارلىق ءتورت قىزمەتكەرى دە قىلمىستىق جاۋاپكەرشىلىككە تارتىلۋىن تالاپ ەتىپ وتىر. سونداي-اق، ول ارنايى مەكەمەدە ايەل زورلاۋدىڭ باسقا دا وقيعالارى زەرتتەلىپ،  انىقتالۋى ءتيىس دەپ سانايدى.

«ءبىز لا-155/18 مەكەمەسىن ەرمەك وماربەكوۆ باسقارعان جانە ن. سلەكيشينانى زورلادى دەپ ايىپتالعان رۋسلان حاكيموۆ قىزمەت ەتكەن ۋاقىتتاعى باسقا دا قاماۋعا الىنعانداردىڭ تەكسەرىلۋىن تالاپ ەتەمىز»، - دەيدى ا. وماروۆا.

تانىمال قۇقىققورعاۋشى ەۆگەنيي جوۆتيس تە تۇزەۋ مەكەمەلەرىندەگى بۇل جاعدايعا ءاتۇستى قاراۋشىلىق بايقالاتىنىن ايتادى.

«بۇل ءىس كولونيالاردا قاۋىپسىزدىكتىڭ قامتاماسىز ەتىلمەگەنىن كورسەتەدى. بۇل ءىس ەرەكشە باقىلاۋعا الىنىپ، اياعىنا دەيىن جەتۋ كەرەك. اتالعان وقيعادا پروكۋراتۋرانىڭ دا دارمەنسىزدىگى بەلگىلى بولىپ قالدى. ءىس پروكۋراتۋراعا تۇسىسىمەن بىردەن سوتقا جونەلتىلدى. ەشقانداي زەرتتەۋ، تەكسەرۋ جۇرگىزىلمەدى»، - دەيدى ول.

بۇعان دەيىن جوعارىدا اتالعان مەكەمەدە قاماۋدا بولعان ن. سلەكيشينانىڭ زورلانعاندىعى تۋرالى جازعان بولاتىنبىز.