«رۋلاس جىگىتتى ۇناتىپ، جان مەن ار ازابىن تارتىپ شارشادىم» دەگەن بويجەتكەن سىرىمەن ءبولىستى، - دەپ جازادى Qamshy.kz.

«ءبىر كۇنى مەندەگى شىدام شەگىنە جەتتى. بار ەرىك-جىگەرىمدى جيناپ، وعان حابارلاستىم. ەكەۋىمىز كەزدەسىپ، ۇزاق سىرلاستىق. ونىڭ دا مەندە كوڭىلى بارىن ءبىلدىم. ەندى عانا جاراسىپ، باقىتتى بولامىز دەگەن قۋانىشىمىز ەكى ساعاتقا عانا سوزىلدى.

ەكى ساعات...

سوسىن ءبارى ءبىتتى...»

وسىلاي دەگەن گۇلىم وزىمەن رۋلاس جىگىتپەن قالاي بايلانىسقانىن ايتىپ بەردى.

الماتىلىق گۇلىم ەسىمدى بويجەتكەن  «اقىل توقتاتىپ، ەس بىلگەلى بولاشاعىمدى سانالى ازاماتقا تاپسىرىپ، سانالى ۇرپاق تاربيەلەۋدى ءجيى ويلايتىنمىن» دەيدى. سول سەبەپتى دە كولدەنەن جولىققان كوك اتتىعا بۇرىلىپ قاراي بەرمەپتى.

-وسىدان بىرنەشە جىل بۇرىن «مەنى جانە بالالارىن» ايالاي الادى-اۋ دەگەن جىگىتتى جولىقتىردىم. انىعىندا ونى ومىردە ءبىر-اق رەت كورگەنمىن. كورگەن كەزدە ءمان بەرمەگەنىممەن،  كەيىن ول ادام تۋرالى ءجيى ويلايتىنمىن. قايدا جۇرگەنى، نە ىستەپ جاتقانى قىزىقتىراتىن. وزىنەن سۇراۋعا باتىلىم بارماي تالاي ۋاقىت جوعالتتىم. ونى شىنىمەن بولاشاقتا «جولداسىم وسى جىگىت بولسا ەكەن» دەپ قيالدايتىن بولدىم، - دەيدى گۇلىم.

تانىستىقتان سوڭ، بىرنەشە جىلدان كەيىن عانا ارالاسا باستاعان ەكى جاس ءجيى بولماسا دا، اندا-ساندا قال سۇراساتىن كۇنگە جەتىپتى.

گۇلىمنىڭ ايتۋىنشا، ءوزىن ايتتىرۋشىلار، قولىن سۇراۋشىلار، ۇسىنىس جاساۋشىلاردىڭ سانى ارتقان. ءبىراق كوڭىلى مەن بۇيرەگى الگى جىگىتكە بۇرىپ تۇرىپتى.

اراداعى سىر اشىلىپ، ەكى جاس كەزدەسۋگە شەشىم قابىلدايدى. بىرگە تاماقتانىپ، ءبىراز سەرۋەندەپ، ۇزاق سىرلاسادى. ال اڭگىمە اراسىندا ەكەۋى ءبىر رۋدىڭ ادامدارى ەكەنىن بىلەدى.

-ەكەۋىمىز دە ءۇنسىز تاعى ءبىر ساعات وتىردىق. سوسىن ول ءجاي عانا ۇيىڭە جەتكىزىپ سالايىن دەدى دە، ءۇي الدىنا كەلگەندە «جوعالىپ كەتپە. ءبىز ەندى بۇرىنعىدان دا جاقىن جاندارمىز. اعاسى مەن قارىنداسپىز» دەدى. مەن ءۇنسىز باس يزەدىم. سودان بەرى بىر-بىرىمىزگە حابارلاسپايمىز. ءبىراق  جان مەن ار ازابى جانىمدى جەگىدەي جەپ بارادى، - دەيدى بويجەتكەن.

قانشاما ۋاقىت سەزىمدەرىن ايتۋعا ابا الماي، ىشتەي تىنعان ەكى جاس ەندى تابىسقاندا بەلگىلى بولعان سىر، ەكەۋىن دە ەسەڭگىرەتىپ جىبەرگەن.

-وتىرا قالىپ جەتى اتامىزدى ساناستىق. جەتى اتامىزدان سايكەس  كەلمەيدى، ءتىپتى 13-14 اتا ارىدا جاتىر ەكەن، - دەيدى گۇلىم.

سىرىنىڭ جەت شاعاسىن اناسىنا ايتسا، ول «ءبىزدىڭ رۋدا بىر-بىرىمەن قىز الىسپايدى» دەپ قىسقا قايىرىپتى.

قازاقتا ءبىر رۋدىڭ ادامدارى ءتوس قاعىستىرىپ، قۇدا بولمايدى. بۇل قىز الىپ، قىز بەرىسۋدە اسا ءمان بەرىلەتىن ماسەلە. ءبىر رۋدىڭ ادامدارى ەشقاشان قىز الىسىپ، قىز بەرىسكەن ەمەس. ءبىر رۋدىڭ قىز-جىگىتى بىر-بىرىنە اعا-قارىنداس بولىپ قالا بەرمەك.  بۇل ادەتتە ۇرپاقتىڭ قانى مەن دەنى ساۋ، دۇرىس بولۋى ءۇشىن جاسالاتىن امال ەكەنى انىق.

دەگەنمەن ءبىر رۋدىڭ ادامى بولسا دا، جەتى اتادان اسقان سوڭ قىز الىسا بەرەتىن رۋلار دا بار.

ينديرا قۋات