ەراسىل اۋباكىروۆتىڭ جانتۇرشىگەرلىك ولىمىنە قاتىستى ىستە جاڭا دەرەك شىقتى. بۇگىن جازادان وڭاي سىتىلىپ كەتكەن ايان مەيىربايەۆ پەن ونىڭ اكەسىنىڭ سوتقا جابىرلەنۋشى رەتىندە قاتىساتىنى بەلگىلى بولدى، - دەپ حابارلايدى Qamshy.kz كتك ارناسىنا سىلتەمە جاساپ.
ال ستۋدەنتتىڭ قازاسىنا ايىپتالۋشىلاردىڭ ءبىرى - نۇربەك ءاجىمبايدىڭ ءۇشىنشى ادۆوكاتى بولىپ سەرىك سارسەنوۆ ىسكە كىرىستى . ول 4 جىل بۇرىن «ارقانكەرگەندە» 15 ساربازدى قىرىپ سالعان ۆلاديسلاۆ چەلاحتىڭ قورعاۋشىسى بولاتىن.
چەلاحتى اقتاي الماي سوتتا تالاي شۋ شىعارعان سەرىك سارسەنوۆ «ەراسىل ىسىمەن» باستان-اياق تانىسىپ ۇلگەرىپتى. ايتۋىنشا، ماتەريالدار پروكۋراتۋراعا بەرىلگەندىكتەن ءىستى قۇپيا ۇستاۋ شارتى ءوز كۇشىن جويعان ەكەن. تەرگەۋ ماتەريالدارىن وقىپ شىققان سارسەنوۆ ورەسكەل زاڭ بۇزۋشىلىقتارعا بايلانىستى 22 جاستاعى نۇربەك ءاجىمبايعا قاتىستى قوزعالعان ءىستىڭ جابىلۋىن سۇراپ ءوتىنىش جازعان. سارسەنوۆتىڭ ايتۋىنشا، باستى ايىپتالۋشىلاردىڭ ءبىرى بولعان ايان مەيىربايەۆ پەن ونىڭ وسكەمەندىك كاسىپكەر اكەسى سوتقا جابىرلەنۋشى رەتىندە قاتىسپاق.
سەرىك سارسەنوۆ، نۇربەك اجىمبايەۆتىڭ ادۆوكاتى:
-مەيىربايەۆ 2 باپ بويىنشا سوتقا جابىرلەنۋشى رەتىندە قاتىسقالى جاتىر. ونىڭ اكەسى دە «مەنەن اقشا بوپسالادى» دەپتى. سوندىقتان ول دا جابىرلەنۋشى. ال مەن قورعاۋىما العان نۇربەك ءاجىمبايدىڭ تەرگەۋ باستالعاننان بارلىق كونستيتۋسيالىق قۇقىعى بۇزىلعان. وسى سەبەپتى وعان قاتىستى قىلمىستىق ءىس توقتاتىلۋى كەرەك. بولماسا، قايتا تەرگەلسىن.
سەرىك سارسەنوۆ تەك سوتقا دەيىنگى ماتەريالداردى قاراۋعا كومەكتەسەتىندىكتەن استاناداعى پروسەسكە قاتىسپايدى. ءبىر قىزىعى، ىشكى ىستەر مينيسترلىگى وسى ايان مەيىربايەۆتىڭ ەراسىل اۋباكىروۆكە ءجابىر كورسەتىپ جاتقان ۆيدەوسىنا قاراماستان ونى 3 اي بۇرىن بوساتىپ جىبەرگەن. سويتسە، پوليسەيلەر مەيىربايەۆتىڭ ارەكەتىنەن قىلمىس ءىزىن تابا الماعان. اقپان ايىندا قالا سىرتىنان ءولى دەنەسى تابىلعان مەديسينا ۋنيۆەرسيتەتى ستۋدەنتىنىڭ ولىمىنە كۇدىكتى رەتىندە 4 ادام، ياعني ايان مەيىربايەۆ،اندرەي تيحونەنكو، ۆيتاليي شەرستەنيەۆ جانە نۇربەك ءاجىمباي ۇستالعان ەدى. ەندى تامىز ايىنىڭ سوڭىنا تامان باستالاتىن سوتتا ايىپتالۋشىلار ورىندىعىنا تەك ۇشەۋى وتىراتىن بولدى.
