بۇگىن الماتىدا ۇلتتىق بانك ءتوراعاسىنىڭ قاتىسۋىمەن وتكەن كەزدەسۋدە بۇل ماسەلە تاعى قىلاڭ بەردى. جيناقتالعان اقشاسىن سالىمشىعا باسپانا الۋ ءۇشىن، ەمدەلۋ ءۇشىن نەمەسە ءبىلىم الۋ ءۇشىن نەگە بەرمەسكە دەپ ۇسىنىس تاستاعان باس بانكير، بۇل ويىنان اينىپ قالعانداي، - دەپ حابارلايدى Qamshy.kz 31-ارناعا سىلتەمە جاساپ.

زەينەتكە شىقپاي تۇرىپ، ۇلتتىق ءبىرىڭعاي زەينەتاقى قورىنداعى قاراجاتتى ۋاقىتشا قولدانۋ مۇمكىندىگى جالدامالى پاتەر بوساعاسىنان سىعالاپ جۇرگەن وتباسىعا باسپانا الۋعا، گرانتتان قاعىلعان تالاپكەرگە نەسيەگە جۇگىنبەي جوعارعى وقۋ ورنىنا تۇسۋگە مۇرسات بەرەر ەدى. الايدا بۇل سۇراقتى جان-جاقتى تالقىلاپ جاتىرمىز دەگەن ۇلتتىق بانك ءتوراعاسى، العان بەتىنەن قايتىپ قالعان سياقتى. سەبەبى بۇگىن ول مەملەكەتتىڭ باستاپقى ماقساتى تۇرعىندارىمىزدى قارتايعان شاعىندا مۇقتاجسىز كارىلىكپەن قامتاماسىز ەتۋ.      

دانيار اقىشيەۆ، ۇلتتىق بانك ءتوراعاسى:

- ءبىرىنشى كەزەكتە بۇل قارتايعان شاعىن قامتاماسىز ەتە الاتىن، جيناعى جەتكىلىكتى دەڭگەيدەگى ادامدارعا قاتىستى. ياعني بۇل سۇراقتى سالىمشىنىڭ جيناعى قاجەتتى كولەمنەن ارتىپ جاتقاندا عانا قاراستىرۋعا بولادى. جيناقتاۋشى زەينەتاقى جۇيەسىنە تۇراقتىلىق قامتاماسىز ەتۋ دە ماڭىزدى ماسەلە. ادامدار بۇل مۇمكىندىكتى قولدانامىز دەپ، زەينەتكە شىققاندا تاقىرعا وتىرىپ قالماۋى قاجەت.

دەسە دە دانيار اقىشيەۆ زەينەتكەرلىك دەمالىسقا شىقپاي تۇرىپ، زەينەتاقى قورىندا جيناقتالعان اقشانى الۋدىڭ وزگە جولىن ۇسىندى. ونىڭ ايتۋىنشا، اركىمنىڭ قورداعى قاراجاتتى ساقتاندىرۋ كومپانياسىنا اۋدارىپ، زەينەتاقى اننۋيتەتى تۋرالى كەلىسىم شارت قۇرۋعا قۇقىعى بار. ونى ايەلدەر 50 جاستان، ال ەرلەر 55 جاستان باستاپ راسىمدەي الادى. الايدا بۇل ءۇشىن جيناقتاعان اقشاڭىز بەلگىلى ءبىر سومادان اسۋى كەرەك. 

ۆلاديمير اكەنتيەۆ،  ساقتاندىرۋ كومپانياسى ءتوراعاسىنىڭ ورىنباسارى:

- ءسىز زەينەتكە ەرتە شىعۋعا قۇقىلىسىز، الايدا ول ءۇشىن جيناعىڭىز ەرلەر 6 ميلليون، ال ايەلدەر 8 ميلليون تەڭگەگە جۋىق اقشا جيناۋى كەرەك. تەك وسى جاعدايدا عانا ساقتاندىرۋ كومپانياسى سىزبەن كەلىسىم شارتقا وتىرادى. سونداي-اق ءبىرىڭعاي جيناقتاۋشى زەينەتاقى قورىنداعى قاراجات مۇراعا قالدىرىلسا، ساقتاندىرۋ كومپانياسىندا مۇنداي شارت جوق. ەگەر ادام زەينەتاقى اننۋيتەتى تۋرالى كەلىسىم شارت جاساپ، 1 جىلدان كەيىن دۇنيەدەن وزىپ كەتسە، قاراجاتى جاقىندارىنا بەرىلمەيدى.

جالپى بىلتىرعى جىلى ساقتاندىرۋ ۇيىمدارىنا 6 مىڭنان استام سالىمشى ءوز جيناعىن اۋدارعان ەكەن. ال جىل باسىنان بەرى اننۋيتەت ساتىپ الۋشىلار كولەمى 1300 ادامعا جۋىقتاعان. ياعني، وسىنشا ادام مەرزىمىنەن ەرتە زەينەتىن كورە باستادى. الايدا بۇل تەندەنسيا جالعاسىن تاپسا جيناقتاۋشى زەينەتاقى جۇيەسىنە ءتيىمسىز. ال، ۇلتتىق بانك ءتوراعاسى وتكەن اپتادا كۇرت كوتەرىلگەن دوللارعا قاتىستى جاۋاپتى قىسقا قايىردى. مۇناي باستى فاكتور، دەگەنمەن وزگە دە كۋرسقا ىقپالدى سەبەپتەردى ەسكەرسەك، مۇناي ارزانداعان سايىن تەڭگە دە قۇنسىزدانا بەرەدى دەۋگە بولمايدى دەدى ول.