الماتىدا اۆتوبۋستىڭ اپاتقا ۇشىراۋىنا باسقا ءبىر كولىك سەبەپ بولعان كورىنەدى. 13 جولاۋشىنى اۋرۋحانادان ءبىر-اق شىعارعان اۆتوبۋس جۇرگىزۋشىسى بۇگىن ءوزىنىڭ كىناسىز ەكەنىن ايتتى. اكىمجان شامييەۆتىڭ ايتۋىنشا، قوعامدىق كولىكتى جول بويى جاعالاسقان جۇرگىزۋشىلەردىڭ ءبىرى قىسىپ جىبەرىپتى. جولاۋشىعا لىق تولى اۆتوبۋس كەشە كەشكە رايىمبەك جانە ءسۇيىنباي داڭعىلدارىنىڭ قيىلىسىندا بەتون قابىرعاعا سوعىلعان بولاتىن. جولاۋشىلاردىڭ اراسىندا ايى-كۇنى جاقىنداعان جۇكتى ايەل دە بولعان، - دەپ حابارلايدى Qamshy.kz كتك ارناسىنا سىلتەمە جاساپ.   

اۆتوبۋستان اۋزى-مۇرنى قاناپ شىققان جولاۋشىلار ىشتە قالعاندارعا دەرەۋ كومەك شاقىرتىپ جاتىر. بۇل كادرلاردى وقيعا كۋاگەرلەرى ءتۇسىرىپ العان. جالپى، قابىرعاعا وڭباي سوعىلعان قوعامدىق كولىكتى قىزىق كورىپ تۇرعاندار جەتەرلىك. تەك ونىڭ ىشىندە جۇكتى ايەل مەن تاعى 12 جولاۋشى قينالىپ جاتىر-اۋ دەگەن ەشكىمنىڭ ويىنا كىرىپ-شىقپايتىن سياقتى. سوققىنىڭ قاتتى بولعانى سونشالىق، اۆتوبۋس جۇرگىزۋشىسى باشپايلارىنان ايىرىلعان. امپۋتاسيادان سوڭ ەسىن جيعان اكىمجان شامييەۆ ءوزىن كىنالىمىن دەپ وتىرعان جوق.  

اكىمجان شامييەۆ، اۆتوبۋس جۇرگىزۋشىسى:

-جارىسقانىم جوق. كوپىردەن ءتۇسىپ بارا جاتتىم. ارىپتەسىمە اۆتوبۋستى بەرگەلى جاتقانمىن. كەيىن بىت-شىتى شىقتى ءبارىنىڭ.

28 جاستاعى جىگىت جول ۇستىندە ءحالى ناشارلاعانىن ايتادى. سول سەبەپتى دە، اۆتوبۋستى باسقا جۇرگىزۋشىگە تابىستاماق بولعان ەكەن. الايدا جول بويى جاعالاسقان كولىكتەردىڭ ءبىرى وعان كەسىرىن تيگىزىپتى.      

اكىمجان شامييەۆ، اۆتوبۋس جۇرگىزۋشىسى:

- كىشكەنە كەزىمنەن اۆتوبۋستا كوندۋكتور بوپ ىستەدىم. الماتىدا اۆتوبۋس جۇرگىزگەنىمە   8 جىل بولدى. جوق، قۇداي ساقتاسىن بۇنداي جاعداي بولماعان.  جازىم عوي ەندى كىمنىڭ باسىنا كەلمەيدى؟

-جىلدامدىقتى مەجەدەن اسىرمادىم دەپ انت-سۋ ىشكەن اۆتوبۋس جۇرگىزۋشىسى مىنە ءدال وسى بۇرىلىسقا كەلگەن تۇستا ونى باسقا ءبىر كولىكتىڭ باسا وزا شاۋىپ، وسىندا قاراي بۇرىپ جىبەرگەنىن ايتادى. ءبىراق سول كەزدە باسى اۋىرىپ تۇرعان جىگىت ول كولىكتىڭ نە ءتۇرىن دە، نە ءتۇسىن دە بايقاماپتى. ەگەردە ونىڭ ايتىپ تۇرعانى راس بولسا، ول جاعدايدى مىنە مۇندا ءىلىنىپ تۇرعان بەينەباقىلاۋ كامەرالارى ءتۇسىرىپ الۋى ابدەن مۇمكىن.

وسى وقيعا سالدارىنان 13 ادام اۋرۋحانادان ءبىر-اق شىققان. ولاردىڭ ەكەۋىنە وتا جاسالدى. ال جۇكتى ايەلدىڭ ميى شايقالعان. 

نۇرجان يسابەكوۆ، الماتى قالاسى دەنساۋلىق ساقتاۋ باسقارماسىنىڭ باس حيرۋرگى:

-ول ناۋقاسقا تۇسكەن كەزدە ارنايى زەرتتتەۋ جۇرگىزىلدى ءىش قۋىسىنا، بالاعا، سوندىقتان ەشقانداي قاۋىپ-قاتەر بولماعاندىقتان، ناۋقاس قازىرگى تاڭدا نەيروحيرۋرگيا بوىلىمىندە جاتىر. ارنايى ەم الىپ جاتىر.

زارداپ شەككەندەردىڭ اراسىندا 14 جاستاعى بالا مەن 74 جاستاعى قاريا دا بار. زەينەتكەردىڭ اياق-قولى سىنعان. ءقازىر جول اپاتىنا قاتىستى قىلمىستىق ءىس قوزعالدى.