2016 جىلدىڭ العاشقى جارتىسىندا قازاقستانعا شەت ەلدەردەن 15 مىڭعا جۋىق قازاق كوشىپ كەلگەن ، - دەپ حابارلايدى Qamshy.kz.

ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ وسىنداي مالىمەت تاراتتى.

«2016 جىلعى 1 شىلدەدەگى دەرەكتەر بويىنشا، ەلگە 6840 وتباسى نەمەسە 14947 ەتنيكالىق قازاق كوشىپ كەلىپ، «ورالمان» مارتەبەسىن العان. ولاردىڭ باسىم بولىگى (66،7 پايىز) وزبەكستاننان، 23،6 پايىزى قىتايدان، 4،2 پايىزى تۇركمەنستاننان، 2،4 پايىزى موڭعوليادان، قالعان 3،1 پايىزى باسقا ەلدەردەن كوشىپ كەلگەن»، - دەلىنگەن مينيسترلىك تاراتقان حابارلامادا.

شەت ەلدەردەن كوشىپ كەلگەن قانداستاردىڭ باسىم بولىگى الماتى (2364 وتباسى، 4729 ادام)، وڭتۇستىك قازاقستان (1572 وتباسى، 3044 ادام) جانە ماڭعىستاۋ (506 وتباسى، 2311 ادام) وبلىستارىنا قونىستانعان.

كوشىپ كەلگەندەر ىشىندە ەڭبەككە جارامدى جاستاعى ازاماتتار ۇلەسى 64،2 پايىز، 18 جاسقا دەيىنگى بالالار 29،7 پايىزدى، زەينەتكەرلەر 6،1 پايىزدى قۇراعان.

ەڭبەككە جارامدى ورالمانداردىڭ 10،8 پايىزى جوعارى ءبىلىمدى، 17،8 پايىزى ارناۋلى ورتا، 68،1 پايىزى جالپى ورتا ءبىلىمى بارلار. ءبىلىم الماعاندار ۇلەسى 3،3 پايىزدى قۇرايدى.