اقش يسلام عۇلاماسى فەتحۋللاح گۇلەندى تۇركياعا بەرمەۋى مۇمكىن. ويتكەنى، تۇرىك بيلىگىنىڭ ونى ەكستراديسيالاۋ ءۇشىن ۇسىنعان دالەلدەرى جەتكىلىكسىز كورىنەدى ، - دەپ حابارلايدى Qamshy.kz ريا نوۆوستي – عا سىلتەمە جاساپ.
دەرەككوزدەردىڭ حابارلاۋىنشا تۇركيا مەن اقش-تىڭ رەسمي وكىلدەرى ف. گۇلەندى ەكستراديسيالاۋدىڭ ءتۇرلى سەنارييلەرىن تالقىلاعان. الايدا، انكارا امەريكاندىق شەنەۋنىكتەردى ايتقاندارىنا كوندىرە الماعان.
سوندىقتان، بۇل ماسەلە جونىندە اقىرعى شەشىم ءالى قابىلدانباعانى، ال، كەلىسسوزدەردىڭ بىرنەشە ايعا دەيىن سوزىلىپ كەتۋى مۇمكىن ەكەندىگى ايتىلۋدا.
ءبىرقاتار باسىلىمدار تۇركيا تاراپىنان گۇلەندى قايتارۋعا بايلانىستى رەسمي تالاپ قويىلماعانىن، اقش قورعانىس باسشىلارىنىڭ تۇركياعا ساپارى بارىسىندا دا توڭكەرىسكە اقش-تىڭ قاتىسى تۋرالى ەشتەڭە ايتىلماعانىن جازۋدا.
بۇعان دەيىن تۇركيانىڭ ادىلەت ءمينيسترى بەكىر بوزداق ف. گۇلەننىڭ اقش-تان قاشىپ كەتۋى مۇمكىن ەكەنىن مالىمدەگەن بولاتىن. ال، گۇلەننىڭ ءوزى بولسا، تۇركيادا بولعان توڭكەرىس جاساۋ ارەكەتىنە ەش قاتىسى جوقتىعىن ايتىپ، مالىمدەمە جاساعان.
