رەسپۋبليكالىق «جاس الاش» گازەتىنىڭ قىزمەتكەرلەرى الماتى قالاسى اۋەزوۆ اۋداندىق ءىىب قىزمەتكەرلەرىنىڭ ارەكەتىنە شاعىمدانىپ، سوتقا ارىز ءتۇسىردى ، - دەپ حابارلايدى Qamshy.kz ازاتتىققا سىلتەمە جاساپ.

21 مامىر كۇنى رەسپۋبليكا اۋماعىندا وتكەن جەر رەفورماسىنا نارازىلىق اكسياسى كەزىندەگى اۋداندىق پوليسيا باسقارماسىنىڭ قىزمەتكەرلەرىنىڭ ارەكەتىنە «جاس الاش» رەسپۋبليكالىق گازەتىنىڭ قىزمەتكەرلەرى سانسىزباي مولداسانوۆ، اسىلحان ءابدىرايىم مەن قۋانىش نۇردانبەك ۇلى شاعىم تۇسىرگەن.

جۋرناليستەر شاعىمى بويىنشا اۋەزوۆ اۋداندىق سوتىندا بۇگىن ءوتۋى ءتيىس بولعان سوت وتىرىسى پوليسيا وكىلىنىڭ «سوتقا دايىن ەمەستىگىنە» بايلانىستى 16 تامىزعا قالدىرىلدى.

«جاس الاش» قىزمەتكەرلەرىنىڭ ادۆوكاتى گۇلنار جۋاسپايەۆا سونداي-اق، سۋديادان جاۋاپتى تاراپ رەتىندە قالالىق ىشكى ىستەر دەپارتامەنتىن دە تارتۋدى سۇراعان. ادۆوكاتتىڭ ول ءوتىنىشى دە كەلەسى سوت وتىرىسىندا قارالاتىن بولدى.