استانا قالاسىنداعى قازاقستاننىڭ باس مەملەكەتتىك تۋىن كۇتىپ ۇستاۋ جۇمىستارىن اتقارۋ تۋرالى كەلىسىم-شارت قۇنى 38،78 ميلليون تەڭگەنى قۇراعان، - دەپ حابارلايدى Qamshy.kz.

استانانىڭ ەسىل اۋداندىق اكىمدىگى «A&K Company» جشس-مەن جاساعان كەلىسىم-شارت قۇنى وسىنشا سومانى قۇرايدى.

مەملەكەتتىك ساتىپ الۋ قۇجاتتارىنا «كونكۋرس» تۇرىندە ۇيىمداستىرىلعان مەملەكەتتىك ساتىپ الۋ پروسەدۋراسى وتپەدى دەپ تانىلعان.

«A&K Company» ج ش س وكىلدەرىن شاقىرۋ ارقىلى ءبىر كوزدەن مەملەكەتتىك ساتىپ الۋلار كەلىسىم-شارتىن جاساۋ تۋرالى شەشىم قابىلداندى»، - دەلىنگەن مەملەكەتتىك ساتىپ الۋلار حاتتاماسىندا.

ەلەكتروندى ۇكىمەت پورتالىنداعى مالىمەتتەرگە سەنسەك، اتالعان ج ش س 2014 جىلدىڭ 20 ناۋرىزىندا قۇرىلعان. كومپانيا نەگىزىنەن ەلەكتروتەحنيكالىق جانە جوندەۋ جۇمىستارىمەن شۇعىلدانادى.

ەسىل اۋداندىق اكىمدىگى 38 ميلليون تەڭگەنىڭ «قازاقستاننىڭ اتامەكەن كارتاسى» ەتنومەموريالدى كەشەنىندە ورنالاسقان قازاقستان رەسپۋبليكاسىنىڭ مەملەكەتتىك تۋىن كۇتىپ ۇستاۋعا جۇمسالاتىنىن حابارلاعان. اكىمدىكتەگىلەردىڭ ايتۋىنشا قالادا جاۋىن-شاشىننىڭ كوپ ءتۇسۋى مەن جەلدىڭ سالدارىنان تۋدىڭ ءبۇلىنۋى ءجيى ورىن الاتىن كورىنەدى.

استاناداعى ەلىمىزدىڭ باس تۋى بيىكتىگى 111 مەتر بولاتىن تۋ تۇعىرعا ورنالاسقان. تۋدىڭ ءوزى 450 شارشى مەتر. وسى تۋ مەن تۋتۇعىردى كۇتىپ ۇستاۋعا، قاجەتتىلىك تۋعاندا اۋىستىرۋعا استانالىق شەنەۋنىكتەر 38 ميلليوننان استام قاراجاتتى قيىپ وتىرعان كورىنەدى.

وسى تۇستا نازار اۋدارارلىق ءبىر ءجايت، كونكۋرستىڭ ءبىر عانا الەۋەتتى مەردىگەرمەن كەلىسىم جاساۋ ارقىلى ءوتۋى. ادەتتە مۇنداي كەلىسىمدەر كونكۋرسقا ءبىر عانا قاتىسۋشى قۇجات ۇسىنىپ، باسقا باعا ۇسىنىستارى بولماعاندا عانا جاسالادى. ال، ءتۇرلى قىزمەت كورسەتۋشى كاسىپورىندار قومسىناتىنداي، كونكۋرسقا قاتىسۋدان باس تارتاتىنداي 38 ميلليون تەڭگە از اقشا ەمەس.

مەملەكەتتىك تۋ – ەلدىگىمىزدىڭ باستى سيمۆولى. ونىڭ استانادا جۇندەي ءتۇتىلىپ، جىرتىلىپ جاتقانىن ەشقايسىمىز قالامايمىز. باستىسى مەملەكەتتىك ءرامىزىمىز ءتۇرلى جەمقورلىق سحەمالاردىڭ سيمۆولىنا اينالىپ كەتپەسە بولدى.