بۇل تۋرالى بۇگىن ق ر پرەزيدەنتى نۇرسۇلتان نازاربايەۆ  ەكىجاقتى كەلىسسوز ناتيجەسى بويىنشا باسپا ءسوز كونفەرەنسياسىندا تۇرىك جۋرناليستەرىنىڭ سۇراقتارىنا جاۋاپ بەرۋ بارىسىندا مالىمدەدى، - دەپ حابارلايدى Qamshy.kz قازاقپاراتقا سىلتەمە جاساپ. 

سونداي-اق، قازاقستانداعى تۇرىك ليسەيلەرىنىڭ جۇمىسىن قازاقستان مەن تۇركيا ءبىلىم بەرۋ مينيسترلىكتەرىنىڭ ماماندارىنان قۇرىلعان بىرلەسكەن جۇمىس توبى تەكسەرەتىنى ايتىلدى. 

«قازاقستاندا جۇمىس ىستەپ تۇرعان مەكتەپتەر – ءبىزدىڭ مەملەكەتتىڭ مەكتەپتەرى. بۇل مەكتەپتەردە ءتورت تىلدە وقىتىلادى. قازاق، ورىس، اعىلشىن جانە تۇرىك تىلىندە. مەكتەپتەردە جۇمىس ىستەيتىن وقىتۋشىلاردىڭ 90 پايىزى قازاقستان ازاماتتارى جانە تەك 8-9 پايىز وقىتۋشىلار تۇركيادان بالالارىن وقىتۋ ءۇشىن كەلەدى»، - دەدى ن. نازاربايەۆ.

مەملەكەت باسشىسى مەكتەپتەردى جەرگىلىكتى اتقارۋشى ورگاندار قارجىلاندىراتىنىن اتاپ ءوتتى.

 «تۇركياعا قارسى جۇمىس ىستەيتىن كۇشتەردى ءبىز ەش ۋاقىتتا قولدامايمىز. بۇل ءبىزدىڭ مۇددەمىزگە جاتپايدى. سوندىقتان ءبىز بۇگىن ەلدەرىمىزدىڭ ءبىلىم بەرۋ مينيسترلىكتەرى جۇمىس توبىن قۇرىپ، ءار مەكتەپتى تەكسەرەدى دەپ ۋاعدالاستىق»، - دەدى ن: نازاربايەۆ.

سونىمەن قاتار مەملكەت باسشىسى بۇل ليسەيلەر تەكسەرىلگەنىن جانە ولاردان زاڭسىز ەشتەڭە تاپپاعانىن اتاپ ءوتتى.

«ءبىز جۇرگىزگەن تەكسەرىسكە سايكەس ولار ەشبىر قازاقستاندىق زاڭداردى بۇزعان جوق. وقىتۋ باعدارلاماسى ق ر ءبىلىم مينيسترلىگىنىڭ وقۋ باعدارلاماسى نەگىزىندە جاسالادى»، - دەپ حابارلادى ن. نازاربايەۆ.

مەملەكەت باسشىسى ەگەر بۇل مەكتەپتەردە تۇركياعا قارسى باعىتتاعى ادامدار بولسا، وندا قازاقستان مۇنى ەش ۋاقىتتا قولدامايتىنىن، ءتيىستى شارا قولداناتىنىن جانە تۇركيانىڭ بارلىق وتىنىشتەرىن ورىندايتىنىن قوستى.

«بارلىق وسى مەكتەپتەردە اتا-انالار ءوز بالالارىن  وقىتقانى ءۇشىن اقى تولەيدى. ءبىلىم بەرۋ ساپاسى وتە جوعارى. ءبىلىم الاتىن 9 مىڭ بالانىڭ بىرنەشە مىڭى الەمدىك وليمپيادا، بايقاۋلاردىڭ جەڭىمپازدارى، ولاردىڭ بارلىقتارى ۋنيۆەرسيتەتتەرگە تۇسەدى»، - دەدى ن. نازاربايەۆ.

قازاقستان پرەزيدەنتى قازاقستاندا تۇرىك ليسەيلەرىن قۇرۋ مارقۇم  تۋرگۋت وزال كەزىندە باستالعانىن ەسكە الدى.

«ءبىز بۇل مەكتەپتەردى ەگەر جاستارىمىز ءبىزدىڭ تىلدەردى بىلسە، بىر-بىرىنە جاقىن بولادى دەگەن نيەتتە قۇردىق»، - دەپ ءسوزىن تۇيىندەدى ن. نازاربايەۆ.