تۇرىك رەسپۋبليكاسىنىڭ پرەزيدەنتى رەجەپ تاييپ ەردوعان ءبىزدىڭ مەملەكەت باسشىسى نۇرسۇلتان نازاربايەۆقا انكارا مەن ماسكەۋ اراسىنداعى ءوزارا قاتىناستى قالپىنا كەلتىرۋ ىسىندە قوسقان ۇلەسى ءۇشىن العىس ءبىلدىردى، - دەپ حابارلايدى Qamshy.kz قازاقپاراتقا سىلتەمە جاساپ. 

 «شىندىعىندا، رەسەيمەن اراقاتىناسىمىزداعى شيەلەنىس كەزەڭىندە نۇرسۇلتان نازاربايەۆ بىرنەشە رەت پۋتينمەن كەزدەسىپ، كەلىسسوزدەر جۇرگىزدى، ءبىزدىڭ قاتىناستاردى  قالپىنا كەلتىرۋ ىسىندە ۇلكەن قولداۋ كورسەتتى. وزبەكستانداعى شىۇ سوڭعى سامميتىندە ول ارنايى ەلشى جىبەرۋىمدى سۇرادى، مەن جىبەردىم»، - دەدى ەردوعان ەكىجاقتى كەلىسسوزدەر قورىتىندىسى بويىنشا باسپا ءسوز كونفەرەنسياسىندا.

تۇرىك مەملەكەتىنىڭ باسشىسى ەلشى ارقىلى ۆ. پۋتينگە جىبەرگەن حاتتان كەيىن بۇل ماسەلە وڭ باعىتقا وزگەردى.

«مەن مۇنى رەسەيمەن ءوزارا قارىم-قاتىناسىمىزداعى بەتبۇرىس دەپ سانايمىن. سوندىقتان بۇل ماسەلەنى شەشۋدە نۇرسۇلتان نازاربايەۆتىڭ ءرولى ەرەكشە.  وزدەرىڭىز بىلەسىزدەر، سارسەنبىدە سانكت-پەتەربۋرگتە پۋتين مىرزامەن كەزدەسەمىن. ءبىزدىڭ دەلەگاسيا كەزدەسەدى»، - دەپ اتاپ ءوتتى ەردوعان.

تۇرىك رەسپۋبليكاسىنىڭ پرەزيدەنتى رەسەيمەن ءوزارا قارىم-قاتىناستاعى اۋىر داعدارىستى ۋاقىتتار  ارتتا قالىپ، بۇرىنعى قاتىناس قالپىنا كەلەتىنىنە  سەنىم ءبىلدىردى.

 «ءبىز نازاربايەۆتىڭ ەڭبەگىن ەش ۋاقىتتا ۇمىتپايمىز. تاعى دا ءوز اتىمنان، تۇرىك حالقىنىڭ اتىنان تۇركيا مەن رەسەي  اراسىنداعى ءوزارا قاتىناستى  قالپىنا كەلتىرۋ ىسىندە زور ىقپالى ءۇشىن العىس بىلدىرەمىن»، - دەدى ەردوعان.