الماتىداعى ءاربىر قوعامدىق كولىك جۇرگىزۋشىسى ديسپەچەرلەردىڭ قاتاڭ باقىلاۋىندا بولادى، - دەپ حابارلايدى Qamshy.kz 24.kz - كە سىلتەمە جاساپ.
كولىك حولدينگىندەگى ماماندار قاتتى جىلدامدىقپەن جۇرگەن، ايالدامالاردا جولاۋشىلارعا توقتاماي كەتكەن نەمەسە ءتيىستى جۇمىس كەستەسىن بۇزعان اۆتوبۋس جۇرگىزۋشىلەرىنە تەلەفون ارقىلى ەسكەرتۋ جاساپ وتىرماق. مۇنداي جۇيەنى جۇزەگە اسىرۋ ءۇشىن جەرگىلىكتى بيۋدجەتتەن 80 ملن تەڭگە بولىنگەن. بۇعان دەيىن دە ديسپەچەرلەر ەلەكتروندى كارتا ارقىلى ءار قوعامدىق كولىكتىڭ قوزعالىسىن باقىلاپ، ەرەجە بۇزۋشىلاردى تىركەپ وتىراتىن. جاڭا جوبا اۆتوبۋس جۇرگىزۋشىلەرىنىڭ جۇمىسىن رەتتەۋگە مۇمكىندىك بەرەدى.
- بۇگىنگى كۇندە بىزدە 8 مارشرۋت، 150-گە جۋىق اۆتوبۋس بۇل جۇيەگە قوسىلدى. تامىز ايىنىڭ اياعىنا دەيىن بۇكىل الماتىداعى 18 تاسىمالداۋشىنىڭ 1500-دەن استام اۆتوبۋسىن وسى جۇيەگە قوسامىز دەپ جوسپارلاپ وتىرمىز. جۇرگىزۋشىنىڭ كومەكشىسى دەگەن ارنايى قۇرىلعى بولادى. ول اۆتوبۋستاردا ورناتىلعان. ول قۇرىلعىدان اۆتوبۋس جۇرگىزۋشىسى ەشقانداي قيمىل جاساماي-اق ديسپەچەرمەن تىكەلەي سويلەسە الادى. جاڭعىرىق داۋىس ارقىلى، - دەيدى قالالىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ماقسۇت يساحوۆ.
