بۇگىن اقتوبە قالالىق №2 سوتى ق ر ادىلەت مينيسترلىگى سوت ساراپتامالىق ينستيتۋتى اقتوبە فيليالىنىڭ ديرەكتورىنا قاتىستى ۇكىم شىعارىپ، وعان ءتورت جىل سەگىز اي مەرزىمدە باس بوستاندىعىنان ايىرۋ جانە مۇلكىن تاركىلەۋ جازاسىن كەستى، - دەپ حابارلايدى Qamshy.kz.

ينستيتۋت فيليالىنىڭ ديرەكتورى مارال مۇستافا ءابىلقايىر حان كەسەنەسىنە جوندەۋ جۇرگىزگەن «ءايناد» ج ش س وكىلىنەن پارا العانى ءۇشىن ايىپتالدى.

مارال مۇستافانى جەمقورلىققا قارسى ءىس-قيمىل جونىندەگى ۇلتتىق بيۋرو قىزمەتكەرلەرى 6 اقپان كۇنى 500 مىڭ تەڭگە كولەمىندە پارا الىپ جاتقان ساتىندە قولعا تۇسىرگەن.

تەرگەۋ مالىمەتتەرىنە ساي، م. مۇستافاعا پارا بەرگەن «ءايناد» ج ش س اقتوبە وبلىسى ايتەكە بي اۋدانىنداعى «حان مولاسى» زيراتىنداعى ءابىلقايىر حان كەسەنەسىنە جوندەۋ جۇرگىزىپ، ونىڭ سىرتىن ادەتتەگى كەراموگرانيتتەن التى ەسە ارزان ساپاسىز ماتەريالمەن قاپتاعان. جوندەۋ جۇمىسى ءۇشىن مەملەكەت قازىناسىنان 30 ميلليون تەڭگە العان كومپانيا وسىلايشا 25 ميلليون تەڭگەنى ۇنەمدەپ قالعانى ايتىلادى.

مەردىگەردىڭ جۇمىسىنا كوڭىلى تولماعان وبلىستىق اكىمدىك ونى سوتقا بەرىپ، باعا ايىرماسىن ءوندىرىپ الۋدى سۇراعان. سوت اتالعان نىساندى قاپتاعان ماتەريالعا ساراپتاما تاعايىندايدى. سوت ماتەريالدارى ساراپتاما ينستيتۋتى فيليالىنا تۇسە سالىسىمەن ونىڭ قىزمەتكەرى مەيرامبەك بەكبەرگەن «ءايناد» ج ش س وكىلىنە حابارلاسىپ، ماسەلەنى فيرمانىڭ پايداسىنا «شەشۋ» جولىن ۇسىنعان. سوت ساراپتاما ورتالىعىنىڭ بەرگەن قۇجاتى كاسىپورىندى بيۋدجەتتەن جىمقىرعان قارجىسىن جانىندا قالدىرۋعا مۇمكىندىك بەرەتىن بولعان سوڭ، كومپانيا باسشىلىعى م. بەكبەرگەن سۇراعان 1 ميلليون تەڭگەنى كوپسىنبەي، ساراپتاما ورتالىعىنىڭ وكىلىنە اكەپ بەرگەن. اتالعان سومانى الۋ ساتىندە م. بەكبەرگەن جەمقورلىققا قارسى قىزمەت وكىلدەرىنىڭ قولىنا تۇسەدى. ۇلتتىق بيۋرو قىزمەتكەرلەرىنە ول اتالعان سومانىڭ تەڭ جارتىسى ءوزىنىڭ باستىعى م. مۇستافاعا تيەسىلى ەكەنىن ايتادى. بيۋرو قىزمەتكەرلەرى م. بەكبەرگەندى م. مۇستافاعا 500 مىڭ تەڭگە «ۇلەسىن» اپارىپ بەرۋگە جۇمسايدى. وسىلايشا، قىزمەتىن جەكە مۇددەلەرىنە پايدالانباق بولعان قوسى ساراپشى دا قۇقىققورعاۋ ورگاندارىنىڭ قۇرىعىنا ىلىنگەن.

كىناسىن مويىنداعانى ءۇشىن م. بەكبەرگەنگە قاتىستى قىلمىستىق ءىس توقتاتىلىپ، باسشىسى م. مۇستافانىڭ ءىسى سوتقا جەتكەن.

ال، ءابىلقايىر مەموريالىنا قاتىستى ساراپتاما قايتادان تاعايىندالعان.