اقتوبە وبلىسىنىڭ اكىمى بەردىبەك ساپاربايەۆ ءدال ءقازىر قىزمەتىندە جوق. وبلىس اكىمىنىڭ مىندەتىن اتقارۋ ونىڭ ورىنباسارى اسقار شەريازدانوۆقا جۇكتەلدى،- دەپ حابارلايدى Qamshy.kz oinet.kz – كە سىلتەمە جاساپ.

ارينە، اكىم ورنىنان بوساتىلدى دەپ وتىرعان ەشكىم جوق. شاماسى بەردىبەك ماشبەك ۇلى تامىز ايىنان باستاپ كەزەكتى ەڭبەك دەمالىسىنا شىعىپ كەتكەن بولۋى مۇمكىن.

ءبىر قىزىعى، اكىمدىك قىزمەتتىڭ تىزگىنىن العان بويدا اسقار شەريازدانوۆ وبلىس اكىمدىگىندە كادرلىق-اۋىس-تۇيىس جاساۋعا كىرىستى. اينالدىرعان 3-4 كۇننىڭ ىشىندە  ءۇش بىردەي باسقارمانىڭ باسشىسىن جاڭارتتى.

 الدىمەن وبلىستىق يندۋستريالدىق-يننوۆاسيالىق باسقارماسىنا جاڭا باسشى تاعايىندادى. بۇل قىزمەت سالاۆات ۆاحيتوۆقا بۇيىردى. بۇدان كەيىن قايرات وتاروۆتى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ەتىپ تاعايىندادى. ال كۇنى كەشە ۇزاق جىلدار پروكۋراتۋرا سالاسىندا ەڭبەك ەتكەن ابدۋحات ءمىرزاليندى جەردىڭ پايدالانىلۋى مەن قورعالۋىن باقىلاۋ جونىندەگى باسقارمانىڭ باسشىسى ەتىپ بەكىتتى.

ادەتتە باسقارمانىڭ باسشىسىن وبلىستىڭ اكىمى تاعايىندايدى. اكىمنىڭ مىندەتىن اتقارۋشىنىڭ دا ءاۋىس-تۇيىس جاساۋعا قۇزىرى جۇرەتىن شىعار. دەگەنمەن ا.شەريازدانوۆتىڭ ءۇش بىردەي باسقارمانىڭ باسشىسىن جاڭارتقانىن كوپشىلىك نەگە جورىرىن بىلمەي اڭ-تاڭ.

جاڭا باسقارما باسشىلارىنىڭ كانديداتۋراسى بەردىبەك ساپاربايەۆپەن الدىن الا كەلىسىلگەن شىعار...كىم بىلەدى، بالكىم، ولاردىڭ اكىمنىڭ «وتپۋسكىدە» جۇرگەن كەزىندە تاعايىندالۋىندا دا ءبىر سىر بار ما ەكەن؟