بۇگىنگى تاڭدا ەلىمىزدە مەملەكەتتىك ساتىپ الۋلاردى وتكىزۋ مەرزىمى ۇزارعان كەزدە مەملەكەتتىك باعدارلامالار اياسىنداعى كوپتەگەن جۇمىستار كەش ورىندالىپ جاتادى. وسىعان بايلانىستى مەملەكەتتى ساتىپ الۋلار جۇيەسىن بارىنشا جەتىلدىرۋ كەرەك. ۇكىمەتتىڭ بۇگىنگى وتىرىسىندا پرەمەر-مينيستردىڭ ورىنباسارى داريعا نازاربايەۆا وسى سالادا كورشى رەسەي فەدەراسياسىنىڭ تاجىريبەسىن قولدانۋدى ۇسىندى، - دەپ حابارلايدى Qamshy.kz Baq.kz – كە سىلتەمە جاساپ.

«بۇگىندە مەملەكەتتىك ساتىپ الۋلار ماسەلەسى وزەكتى بولىپ تۇر. اسىرەسە، مەملەكەتىك ساتىپ الۋلاردى وتكىزۋ مەرزىمىن كەشىكتىرگەن كەزدە ءتيىستى جۇمىستار تۇرالاپ جاتادى. بۇل – جىل سايىن قايتالانا بەرەتىن ماسەلە. ءبىز ونى ىلعي تالقىلاپ جاتامىز. وسىعان بايلانىستى ءبىر ۇسىنىس بار. قازىرگى كەزدە رەگلامەنت پەن پروسەدۋرانى قايتا قاراپ شىعۋ قاجەت. مەملەكەتتىك ساتىپ الۋلاردى وتكىزۋدىڭ ناقتى مەرزىمىن ەنگىزۋ كەرەك. سوسىن كونكۋرستىق شارالار جاعىنان قيىندىق بولىپ جاتسا دا، جۇمىستار توقتاتىلماۋى ءتيىس. سونداي-اق مەملەكەتتىك باعدارلامالارعا جاۋاتى اكىمشىلەردىڭ جەكە جاۋاپكەرشىلىگىن ەنگىزگەن ءجون»،-دەدى د.نازاربايەۆا ۇكىمەتتىڭ بۇگىنگى وتىرىسىندا.

ونىڭ ايتۋىنشا، بۇگىندە مەملەكەتتىك باعدارلامالار بويىنشا بولىنەتىن قارجىنى يگەرۋ بويىنشا كورشى رەسەي فەدەراسياسىنىڭ تاجىريبەسىن زەردەلەپ شىعۋ قاجەت. سەبەبى ول جاعىنان رەسەيلىكتەر ءبىرشاما العا كەتىپ قالدى.

«ولاردا مەملەكەتتىك تاپسىرىس بويىنشا جەڭىمپاز اتانعان كاسىپورىننىڭ بانك ەسەپ-شوتى اشىلادى. سوعان اقشا اۋدارىلادى. ءبىراق ونى تەك تاپسىرىس بەرۋشىنىڭ رۇقساتىن العاننان كەيىن عانا جۇمساۋعا بولادى. وسىنىڭ ارقاسىندا بيۋدجەت قاراجاتىنىڭ جۇمسالۋىن باقىلاپ وتىرۋعا مۇمكىندىك بار»،-دەيدى ۇكىمەت باسشىسىنىڭ ورىنباسارى.

ايتا كەتەيىك، ۇكىمەتتىڭ بۇگىنگى وتىرىسىندا «نۇرلى جول» مەملەكەتتىك باعدارلاماسى اياسىندا بولىنگەن قىرۋار قاراجاتتى ۋاقىتىندا يگەرۋ ماسەلەسى قارالدى. بۇگىندە جەرگىلىكتى جەردە اقشانى يگەرۋ بويىنشا كونكۋرستىق جۇمىستار باياۋ وتكىزىلەتىندىكتەن، باسپانا سالۋ، ينفراقۇرىلىم تارتۋ، مەكتەپ پەن بالاباقشالاردى تۇرعىزۋ جۇمىستارى كەش اتقارىلادى. اكىمدەر قىركۇيەكتىڭ 1-ىنە دەيىن وسى ماسەلەنى شەشۋگە ۋادە بەردى.