ۇلتتىق قاۋىپسىزدىك كوميتەتى مەملەكەتتىك ساتىپ الۋ شەڭبەرىندە قازاقستان رەسپۋبليكاسى قارۋلى كۇشتەرىنىڭ قاجەتتىلىگىنە بولىنگەن بيۋدجەتتىك قارجىنى ۇرلاۋمەن اينالىسقان ءىرى قىلمىستىق توپتىڭ ءىس-قيمىلىن انىقتاپ، جولىن كەستى، - دەپ حابارلايدى Qamshy.kz ۇقك باسپا ءسوز قىزمەتىنە سىلتەمە جاساپ.

"جەدەل-ىزدەۋ ءىس-شارالارى بارىسىندا ق ر قك ماتەريالدى-تەحنيكالىق قامتاماسىز ەتۋ باس باسقارماسى باستىعىنىڭ ورىنباسارى پودپولكوۆنيك ت. جۋمكازييەۆتىڭ قورعانىس مينيسترلىگى مەن قارجى مينيسترلىگىنىڭ لاۋازىمدى تۇلعالارى جانە بىرنەشە ءوزارا ۇلەستەس كوممەرسيالىق قۇرىلىم باسشىلارى تارتىلعان سىبايلاس جەمقورلىق سحەماسىن ۇيىمداستىرعاندىعى انىقتالدى"، - دەپ حابارلايدى ۇقك باسپا ءسوز قىزمەتى.

قورعانىس ۆەدومستۆوسىنىڭ كونكۋرستىق كوميسسياسىنىڭ ءتوراعاسى بولعان ت. جۋمكازييەۆ اتالعان كاسىپكەرلەر مۇددەلەرىنە ىقپالداستىق ەتكەن، ءوزىنىڭ زاڭعا قايشى ارەكەتتەرىن جاسىرۋ ءۇشىن قورعانىس مينيسترلىگى مەن قارجى مينيسترلىكتەرى ورگاندارىن باقىلاۋشى لاۋازىمدى تۇلعالاردىڭ مۇمكىندىكتەرىن قولدانعان.

8 تامىزدا پودپولكوۆنيك ت. جۋمكازييەۆتى 20 ملن. تەڭگە پارا الىپ جاتقان جەرىندە ۇقك اسكەري قارسى بارلاۋ دەپارتامەنتىنىڭ قىزمەتكەرلەرى ۇستاعان.  

قوزعالعان قىلمىستىق ءىس شەڭبەرىندە قورعانىس جانە قارجى مينيسترلىكتەرىنىڭ بارلىعى 5 لاۋازىمدى تۇلعاسى، 4 ج ش س باسشىسى ۇستالىپتى. ولاردان ەداۋىر كولەمدە وتاندىق جانە شەتەلدىك ۆاليۋتا تاركىلەنگەن.

اتالعان قىلمىستىق سحەماعا ءبىرتالاي وزگە دە مەملەكەتتىك ورگاندار لاۋازىمدى تۇلعالارىنىڭ جانە كوممەرسيالىق كاسىپورىنداردىڭ قاتىستىلىعى تەكسەرىلۋدە.

جەدەل-تەكسەرۋ ءىس-شارالارى جالعاسۋدا، ولاردىڭ ناتيجەلەرى قوسىمشا حابارلاناتىن بولادى.