ءال-فارابي اتىنداعى قازۇۋ ستۋدەنتى دميتريي بالاندين ريو-دە-جانەيروداعى وليمپيادا ويىندارىندا «التىن» جۇلدەنى قانجىعاسىنا بايلادى. ول ەرلەر اراسىندا براسس ادىسىمەن 200 مەتر قاشىقتىققا جۇزۋدەن ۇزدىك كورسەتىكشپەن جەڭىسكە جەتتى. بۇل قازاق سپورتى تاريحىنداعى وليمپيادا ويىندارىندا جۇزۋدەن العان العاشقى التىن، - دەپ حابارلايدى Qamshy.kz ۋنيۆەرسيتەتتىڭ باسپا ءسوز قىزمەتىنە سىلتەمە جاساپ.

دميتريي بالاندين - ءال-فارابي اتىنداعى قازۇۋ-دىڭ دەنە شىنىقتىرۋ جانە سپورت كافەدراسىنىڭ 4-كۋرس ستۋدەنتى.

سپورتشى ۋنيۆەرسيتەتتىڭ اعا وقىتۋشىلارى، سپورت شەبەرلەرى اندرەي حوحلوۆ پەن قۋات ماقاشيەۆتاردىڭ جەتەكشىلىگىمەن جاتتىعادى. دميتريي – حالىقارالىق دەڭگەيدەگى سپورت شەبەرى، ازيا چەمپيوناتىنىڭ كۇمىس جۇلدەگەرى، سونداي-اق ينچحوندا وتكەن (وڭت.كورەيا) XVII ازيا ويىندارىنىڭ براسپەن ءجۇزۋ ءادىسى بويىنشا ءۇش دۇركىن التىن مەدال يەگەرى.

بۇعان دەيىن ءال-فارابي اتىنداعى قازۇۋ ستۋدەنتى ەلدوس سمەتوۆ ريو وليمپياداسىندا ەرلەر اراسىنداعى دزيۋدودان 60 كەلىگە دەيىنگى سالماقتا ونەر كورسەتىپ، قازاقستان قورجىنىنا العاشقى كۇمىس مەدالدى سالعان بولاتىن. ەلدوس سمەتوۆ – دزيۋدودان الەم چەمپيونى، حالىقارالىق دارەجەدەگى سپورت شەبەرى.

ريوداعى وليمپيادا ويىندارىنا قازاقستاننىڭ ۇلتتىق قۇراماسىندا قازۇۋ-دىڭ 17 ستۋدەنتى سپورتتىڭ 6 تۇرىنەن: ءجۇزۋ، اۋىر جانە جەڭىل اتلەتيكا، دزيۋدو، ەركىن جانە گرەك-ريم كۇرەسىنەن باقتارىن سىناۋدا.

قازۇۋ ستۋدەنتتەرى سپورتتىق شەبەرلىكتەرىمەن، جەتكەن جەتىستىكتەرىمەن ۋنيۆەرسيتەتتىڭ ەلىمىزدەگى عانا ەمەس، سونىمەن قاتار حالىقارالىق ارەناداعى  ۇزدىك وقۋ ورداسى ەكەنىن تاعى ءبىر دالەلدەدى.