اقتوبەدە لاڭكەستىكتى ناسيحاتتاۋ نەمەسە لاڭكەستىك اكتىسىن جاساۋعا جاريا تۇردە شاقىرۋ قىلمىستىق قۇقىق بۇزۋشىلىعىن جاساعانى ءۇشىن ءۇش ادامعا قاتىستى باس بوستاندىعىنان ايىرۋ ۇكىمى شىعارىلدى، - دەپ حابارلايدى Qamshy.kz قازاقپاراتقا سىلتەمە جاساپ.

سوتتا انىقتالعانداي، ت.ب.ءماجيتوۆ تەلەكوممۋنيكاسيالار جەلىلەرىن پايدالانا وتىرىپ، تەرروريزمدى ناسيحاتتاۋ نەمەسە تەرروريزم اكتىسىن جاساۋعا جاريا تۇردە شاقىرۋ ماقساتىندا، 2015 جىلعى تامىز ايىندا «ۆكونتاكتە» الەۋمەتتىك جەلىسىندە «ابۋحوليد ابدۋمادجيد» اتىمەن وزىنە جەكە پاراقشا اشقان. وسىدان كەيىن ول تانىستارىنا قارجىلىق كومەك جاساۋ تۋرالى ماتىندەر تاراتقان. ودان ءارى، ءماجيتوۆ 2015 جىلدىڭ 7-10 جەلتوقسان ارالىعىندا تەرروريزمدى ناسيحاتتاۋ ماقساتىندا  دوستارىنا  «ۋاقىت كەلدى احي»، «اسسالام ۋالەيكۋم احي ءبىزدىڭ ۋاقىت كەلدى ين شا اللاح»، «قانشا جۇرە بەرەمىز احي» دەگەن مازمۇنداعى ۇندەۋ تۋرالى حات جازىپ، ءوزىن-وزى جارىپ «شاحيد» جاساۋ تۋرالى بەينەروليكتەر جىبەرگەن.

بۇدان سوڭ، ت.ب.ءماجيتوۆ شالقار اۋدانىنىڭ تۇرعىندارى ە.ا.امانعوجين مەن م.س.تۇرعانبايەۆپەن تەلەكوممۋنيكاسيالىق جەلىلەرىن پايدالانا وتىرىپ،  لاڭكەستىكتى ناسيحاتتاعان، سونداي-اق تەرروريزم اكتىسىن جاساۋدى جاريا تۇردە «Whats app» الەۋمەتتىك جەلىسى ارقىلى تاراتقان كورىنەدى.

سوت شەشىمىمەن ءماجيتوۆ كىنالى دەپ تانىلىپ، مۇلكىن تاركىلەپ،  سەگىز جىل مەرزىمگە باس بوستاندىعىنان ايىرۋ جازاسى بەلگىلەندى.  جازانى وتەۋ جەرى رەتىندە تۇزەۋ كولونياسىنىڭ جالپى  رەجيمى  ايقىندالدى. وسىنداي جازا امانعوجينگە دە تاعايىندالدى. ال تۇرعانبايەۆ مۇلكىن تاركىلەۋمەن 6 جىل 6 ايعا سوتتالدى.