2017 جىلى 7 قاراشادا الماتىلىق ترامۆاي 80 جىلدىق مەرەيتويىن اتاپ وتەدى. دەگەنمەن الماتى اكىمى باۋىرجان بايبەكتىڭ وتكەن جىلى 31 قاراشاداعى نۇسقاۋىمەن، قالادا ترامۆاي قوزعالىسى توقتاتىلدى. وعان ترامۆاي سەبەپ بولعان ەكى ءىرى جول اپاتتارى مەن رەلستەردىڭ جارامسىز كۇيگە تۇسكەنى تۇرتكى بولدى، - دەپ حابارلايدى Qamshy.kz centralasian.org – كە سىلتەمە جاساپ.

2015 جىلى 21 قىركۇيەكتە جولاۋشىسىز ترامۆاي 14 اۆتوكولىكتى جولدان ىعىستىرىپ شىعاردى. جول اپاتىنان ءتورت ادام زارداپ شەكتى. ءدال وسىعان ۇقساس وقيعا 13 قازاندا قايتالاندى. كوشە بۇرىلىسىندا جولدان شىعىپ كەتكەن ترامۆاي وننان استام اۆتوكولىكتى زاقىمدادى. ەكى ادام زارداپ شەكتى.

وسى وقيعالاردان سوڭ الماتى اكىمى ترامۆاي پاركىنە بارىپ، ونىڭ جۇمىسىنا كوڭىلى تولمايتىنىن ءبىلدىردى. ترامۆايلاردىڭ جولدان شىعىپ كەتۋى جيىلەگەن: 2015 جىلى وسىنداي وقيعا 43 مارتە تىركەلگەن. كوميسسيا رەلستەردىڭ جارامسىز كۇيگە تۇسكەنىن انىقتادى. ولاردى جاڭارتىپ، قوسىمشا ۆاگوندار الۋ ءۇشىن ميللياردتاعان تەڭگە قاجەت بولادى.

2015 جىلى 31 قازاندا الماتىدا ترامۆاي قوزعالىسى كەمشىلىكتەر تۇزەتىلگەنشە «ۋاقىتشا» توقتاتىلدى. وسى ۋاقىتقا دەيىن كەمشىلىكتەر تۇزەلمەگەن، ويتكەنى قاراجات بولىنبەگەن. بيىل شىلدە ايىندا قالاداعى ءبىرقاتار ترامۆاي جەلىلەرىن بۇزىپ الا باستادى.

قالا بيلىگى ون جىلدان بەرى جىلدام رەلستى ترامۆاي قۇرىلىسىن سالۋعا ۋادە بەرىپ كەلەدى. ول 2020 جىلى ىسكە قوسىلىپ، كۇنىنە 62 مىڭ جولاۋشى تاسيدى دەپ حابارلانعان. ءبىراق، وعان قاتىستى ناقتى جوسپار ءالى جوق.