بۇگىن برازيليانىڭ ريو-دە-جانەيرو قالاسىندا ءوتىپ جاتقان وليمپيادا ويىندارى بەل ورتاسىنان اۋدى. وكىنىشكە قاراي، بۇل كۇنى دە قازاقستان قورجىنىنا مەدال بۇيىرمادى، - دەپ حابارلايدى Qamshy.kz قازاقپاراتقا سىلتەمە جاساپ.

بۇگىن جارىس جولىنا شىققان اكادەميالىق ەسكەك ەسۋ جەكە سايىسىندا قازاقستاندىق سپورتشى ۆلاديسلاۆ ياكوۆليەۆ 7:21،61 ناتيجەمەن 31-ورىنعا تابان تىرەدى. وسىلايشا، ول جۇلدەگە تالاسۋ مۇمكىندىگىنەن ايىرىلدى.
ال 50 مەتردەن ۆينتوۆكامەن جاتىپ اتۋ سايىسىندا يۋريي يۋركوۆ تا فينالعا وتە المادى. ول بار بولعانى 621، 4 ۇپاي جيناپ 25ء-شى ورىنعا تۇراقتادى. 
سونىمەن قاتار، ديسك لاقتىرۋدان ا توبىندا ونەر كورسەتكەن تاعى ءبىر وتانداسىمىز ەۆگەنيي لابۋكوۆ تا ءبىز كۇتكەن ناتيجەنى باعىندىرا المادى. ول فينالعا ءوتۋ ءۇشىن 65 مەتر 50 سم-گە ديسك لاقتىرۋى كەرەك ەدى. الايدا، بۇل مەجەنى ەكى سپورتشى عانا باعىندىرا الدى. ال قازاقستاندىق سپورتشىنىڭ شاماسى بار بولعانى 55،54 مەترگە لاقتىرۋعا جەتتى. وسىلايشا، جارىستى ءوز توبىندا 15ء-شى بولىپ اياقتادى.
بۇگىن سونىمەن قاتار، جەڭىل اتلەتتەر اراسىندا 20 شاقىرىم قاشىقتىقتا سپورتتىق جۇرىستەن جارىستار ءوتتى. وندا قازاقستاندىق گەورگيي شەيكو 34ء-شى بولىپ، مەجە سىعىن كەستى. بۇل سايىستا وتانداسىمىز 20 شاقىرىم قاشىقتىقتى 1:23:31 ۋاقىتتا كەلدى. الايدا، جەڭىس تۇعىرىنان كورىنۋگە تىم تومەن جەتىستىك ەدى.
ال بۇگىن جارىس جولىنا بوكسشىلارىمىزدان تەك جانىبەك ءالىمحان ۇلى عانا شىقتى. قارسىلاسى دا وسال بوكسشى ەمەس ەدى. الايدا، قازاقتىڭ قايسار ۇلى قارسىلاسىن ايقىن باسىمدىلىقپەن ۇتىپ، شيرەك فينالعا جولداما الدى. بۇل وليمپيادا ويىندارىنىڭ مەدالىنە ءبىر تابان جاقىندادى دەگەن ءسوز.
75 كەلى سالماقتا ەل نامىسىن قورعاپ جاتقان قازاق بوكسشىسى جانىبەك ءالىمحان ۇلى الجير بوكسشىسى يلياس ءابباديدى 3:0 ەسەبىمەن تازا ۇتتى.
سوققىلارى دا قارسىلاسىنىڭ كوزدەگەن جەرىنە ءدوپ ءتيىپ جاتتى. وسى بوكستى تاماشالاۋعا كەلگەن ريو تۇرعىندارى مەن قوناقتارى قازاق ازاماتىنىڭ مىقتىلىعىنا تۇرەگەپ تۇرىپ قول سوقتى. وسىلايشا، بۇگىنگى جارىس كۇنى جانىبەكتىڭ شيرەك فينالعا وتكەن جارقىن جەڭىسىمەن ەستە قالدى.
ال تاعى ءبىر مەدال الادى-اۋ دەگەن اۋىر اتلەتىمىز دەنيس ۋلانوۆ 85 كەلىگە دەيىنگى سالماقتا سىنعا ءتۇسىپ، قوس جاتتىعۋدىڭ قورىتىندىسى بويىنشا 390 كەلىنى باعىندىردى. الايدا، بۇل ونى جەڭىس تۇعىرىنا كوتەرىلۋىنە ازدىق ەتتى.
اۋىر اتلەتيكادان بۇل سالماقتا وليمپيادا التىنى قوس جاتتىعۋدىڭ قورىتىندىسى بويىنشا يراندىق كيانۋش روستامي (396 كەلى) السا، كۇمىس جۇلدە قىتايلىق تيان تاوعا (395 كەلى) بۇيىردى. قولا جۇلدە ەرەجەگە سايكەس، دەنيستەن سالماعى جەڭىل بولعاندىقتان رۋمىنيالىق گابريەل سينكراياننىڭ (390 كەلى) ەنشىسىندە كەتتى. ۋلانوۆ وليمپيادانى ءتورتىنشى ورىنمەن اياقتادى.
سونداي-اق، بۇگىن ايەلدەر اراسىندا 100 مەتر قاشىقتىققا جۇگىرۋ سايىستارى ءوتتى. وندا ەل نامىسىن قورعاعان ريما كاشافۋتدينوۆا ىرىكتەۋ كەزەڭىندە 11، 84 سەكۋندپەن 7-ورىندى مىسە تۇتىپ، ول جارىس جولىنان شىعىپ قالدى.
سونىمەن بىرگە، تاعى ءبىر جەلاياعىمىز ۆيكتوريا زيابكينا دا ىرىكتەۋ كەزەڭىندە 100 مەتردى 11، 69 سەكۋندپەن جۇگىرىپ ءوتىپ، ناتيجەسىندە 5-ورىنعا تۇراقتاپ، جارتىلاي فينالعا شىعا المادى. وسى قاشىقتىقتا ونەر كورسەتكەن تاعى ءبىر وتانداسىمىز ولگا سافرونوۆا دا جارتىلاي فينالعا جەتپەي ءسۇرىندى.
ەسكە سالا كەتەيىك، جارىستىڭ العاشقى كۇنىندە دزيۋدودان ەرلەر اراسىندا 60 كەلىگە دەيىنگى سالماق دارەجەسىندە سىنعا تۇسكەن ەلدوس سمەتوۆ ەل قورجىنىنا كۇمىس جۇلدە سالسا، 48 كەلىگە دەيىنگى سالماقتا ايەلدەر اراسىندا جارىسقا قاتىسقان وتگونسەسەگ گالبادراح وليمپيادا ويىندارىنىڭ قولا جۇلدەگەرى اتاندى. ال ءۇشىنشى مەدالدى قورجىنعا اۋىر اتلەت فارحاد حاركي سالدى. ول ەرلەر اراسىنداعى 62 كەلىگە دەيىنگى سالماق دارەجەسىندە ونەر كورسەتكەن بولاتىن. وليمپيادانىڭ ءتورتىنشى كۇنى تاعى ءبىر اۋىر اتلەت قىزىمىز كارينا گوريچيەۆا 63 كەلى سالماقتا ءتورتىنشى مەدالدى ەل قورجىنىنا سالسا، وليمپيادانىڭ بەسىنشى كۇنى ەكى اۋىر اتلەتىمىز نيدجات راحيموۆ پەن دميتريي بالاندين 200 مەتر قاشىقتىققا جۇزۋدەن ەكى التىندى جەڭىپ الدى. ال وسى كۇنى ايەلدەر اراسىندا سىنعا تۇسكەن اۋىر اتلەت جازيرا جاپپارقۇل كۇمىس جۇلدەگەر اتاندى.
تاعى دا ايتا كەتەيىك، بۇگىن قازاقستان قۇراماسى 2 التىن، 1 كۇمىس، 3 قولا مەدالمەن جالپىكوماندالىق ەسەپتە 14-ورىنعا سىرعىدى.